MUKANDA WA KASATU WA MOSE AWITANYINWA’SHI BEENA LEFI (Lefitike) 1 Chapitre 1 1 Na A Yikalayika bayitanyine Mose, amulungwila mu shibo y’efumankeeno, aye’shi : 2 Akula na baana ba Isalele, webalungule’shi : Muntu a munkatshi mwenu palubwiila A Yikalayika mulambu, nulubule mulambu wenu wa nyema ikata sunga nyema ipeela. 3 Su mulambu waye nkitapilo kia kushiikwa kia nyema mukata, eulubule, — nyema mulume, shii kilema1 ; eulubwiile ku kitwelelo kya shibo y’efumankeeno, bwa kwikala mutambulwe kumpala kwa A Yikalayika. 4 Akupu atentekye eyaasa diaye pa mutwe wa [nyema a] mulambu wa kushiikwa, n’akeekala mutambulwe kwadi, bwa kumukitshiina mushiinga wa kumubwikidiila bubi. 5 Atshindjile yawa mwana a ngombe mulume kumpala kwa A Yikalayika ; na baana ba Alone, ba tshiite-mwakwidi, balubule mase, beamiamine mbwipi mooso pa kilambwilo ki ku kitwelelo kia shibo y’efumankeeno ; 6 dingi abaambule musokya wa [nyema a] kitapilo kia kushiikwa na atshibuule bipindji. 7 Na baana ba Alone, tshiite-mwakwidi, abakoosha kaalo pa kilambwilo, baloongye nteete pa kaalo ; 8 na baana ba Alone, ba tshiite-mwakwidi, baloongye bipindji, mutwe mpaa na mwimu, pa nteete yi mu kaalo ke ku kilambwilo. 9 Akupu asuule2 na meema muunda3 na biooko, na tshiite-mwakwidi anaangye bioso pa kilambwilo ; [kiakia] nyi kitapilo kia kushiikwa, kitapilo kia ku kaalo, eshiko di mapembwe e buwa kwi A Yikalayika. *(1) Sunga’shi : Nyema mupwidikye. — (2) Yawa asuula ta ntshiite’ye, nyi ngiawa alambula. — (3) Bangi namu abaamba’shi : Bia muunda. 10 Na su mulambu waye wa kitapilo kia kushiikwa ngwa nyema peela, a munkatshi mwa mikooko sunga a mbushi, eulubule, — nyema mulume shii kilema ; 11 na amutshiindjila mbwipi a kilambwilo, dia ku nuundu, kumpala kwa A Yikalayika ; na baana ba Alone, ba tshiite-mwakwidi, bamiamine mase pa kilambwilo, mbwipi mooso ; 12 akupu amutshibuule bipindji, na mutwe waye na mwimu waye, ngi tshiite-mwakwidi ebiloongye pa nteete yi mu kaalo ke pa kilambwilo ; 13 na asuule na meema muunda na biooko ; na tshiite-mwakwidi alubule bioso ebinaangye pa kilambwilo : [kiakia] nyi nkitapilo kia kushiikwa, kitapilo kia ku kaalo, eshiko di mapembwe e buwa kwi A Yikalayika. 14 Na su mulambu waye walambula A Yikalayika nyi nkitapilo kia kushiikwa kia tooni, alubule mulambu waye wa tukutshikutshi sunga ngwa twaana twa nkudiimba. 15 Na tshiite-mwakwidi ekatwaale ku kilambwilo, n’ekatukule mutwe na lwaala, ekanaangye pa kilambwilo ; afiine mase aako pa mbidi pa kilambwilo. 16 Na akaashe ediilo di’ako na bioso bi mwanka4, akebisuumbule mbwipi mwa kilambwilo, dia ku lupese lutuunduka nguba, pa yaya mbalo yi buto ; 17 kubapu asaane kooni pankatshi pa mbaba, kushii kwikasaa ; ngi tshiite-mwakwidi ekanaangye pa kilambwilo, pa nteete yi pa kaalo : [kiakia] nyi nkitapilo kia kushiikwa, kitapilo kia ku kaalo, eshiko di mapembwe e buwa kwi A Yikalayika. *(5) Ngi kwamba’shi : Tufi twi mwikudiinga. 2 Chapitre 2 *1 Na muntu pakalubwila A Yikalayika mulambu wa kituumbula bu mulambu, mulambu waye wikale wa bukula bwi soo, na akapongoole mwimu mwanka, na akatentekye museengo wa kabaanda panundu ; 2 n’akebutwala kwi baana ba Alone, ba tshiite-mwakwidi ; na tshiite-mwakwidi [umune] akasuna eyaasa diwule dia bwabwa bukula na mwimu, mpaa na kaka kabaanda kooso, ebinaangye [bu] kitentekyeesho pa kilambwilo : [kiakia nyi] nkitapilo kia ku kaalo, eshiko di mapembwe e buwa kwi A Yikalayika ; 3 na bioso abishaala ku mulambu wa kituumbula abikeekala bia Alone na bia baana baaye balume : [kiakia nyi] nkitu kikile selele1 pankatshi pa bitapilo bia A Yikalayika bishiikwe ku kaalo. *(1) Sunga’shi : nkintu kia kishila kikile. 4 Na pokalubula mulambu wa kituumbula kiteekyelwe muunda mwa mafuwa2 bu mulambu, wiikale wa bukula bwi soo, bituumbula bishii kitatusho, bifuuntwe mu mwimu, na ma ngalete ashii kitatusho ashiingwe mwimu. 5 Na su mulambu oobe nyi mulambu wa kituumbula kiteekyelwe kwilata, wiikale wa bukula bwi soo bufuuntwe mu mwimu, bushii kitatusho. 6 Okabaala [wawa mulambu] tupese-tupese, okapongoole mwimu panundu : nyi mulambu wa kituumbula. 7 Na su mulambu oobe mmulambu wa kituumbula kiteekyelwe mu mpanu ; wiikale wa bukula bwi soo, busangakane na mwimu. 8 Na okatwadila A Yikalayika mulambu wa kituumbula ukitshiibwe na bino bintu, abakeulubwiila tshiite-mwakwidi, aye namu akeutwale ku kilambwilo. 9 Na tshiite-mwakwidi akaashe [kwakwa] ku mulambu wa kituumbula ki’ao3 kitentekyesho, ekinaangye pa kilambwilo : [kiakia] nyi nkitapilo kia ku kaalo, eshiko di mapembwe e buwa kwi A Yikalayika. 10 Na bioso abishaala ku mulambu wa kituumbula abikeekala bia Alone na bia baana baaye balume : [kiakia nyi] nkitu kikile selele pankatshi pa bitapilo bia A Yikalayika bishiikwe ku kaalo. *(2) Sunga’shi : muunda mwa fuulo. — (3) Ngi kwamba’shi : kitentekyesho kia mulambu. 11 Mulambu su ngumune wa kituumbula wanukalubula kwi A Yikalayika tawikalanga ukitwe na kitatusho ; mwanda kitatusho na buuki, tanwanebishiikye ku kaalo bu kitapilo kishiikilwe A Yikalayika ku kaalo nya. 12 Bwa mulambu wa A Yikalayika biumbulwanga bibedi, anukebilubwiila A Yikalayika ; anka tabikekala bishiikwe kaalo pa kilambwilo bu eshiko di mapembwe e buwa nya. 13 Na mulambu ooso wa ku mulambu oobe wa kituumbula [onolambule] okeutoba mungwa, na tonokutshishwe kutoba mungwa wa kilombeeno ki’Efile Mukulu oobe mu mulambu oobe wa kituumbula nya ; mu milambu yobe yoso okalubula mungwa. 14 Na su olubwiila A Yikalayika mulambu wa kituumbula wa bikuba4 bibedi, okalubula, bwa mulambu wa kituumbula kia bikuba biobe bibedi, ntete ipya ikaangye ku kaalo, ntete isoose ya ku kifuma5 kilele ntete yi bungi ; okeele na mwimu panundu, 15 n’okatenteka kabaanda panundu : nyi mmulambu wa kituumbula6. 16 Na tshiite-mwakwidi ebinaangye bu kitentekyesho [ku kaalo], kipese kia ku ntete ya mulambu isoose na mwimu waao, mpaa na kabaanda kooso ke ku mulambu : [kiakia] nyi nkitapilo kia ku kaalo bwa A Yikalayika. *(4) Sunga’shi : biumbulwanga bibedi. — (5) Sunga’shi : Ya ku masala akupeela ntete. — (6) Tala mu Kikatukilo 29. 41. 3 Chapitre 3 *1 Su mulambu waye nyi nkitapilo kia kufukama1, su nyema a ku bimunwanga bikata alubula, ekale mulume sunga mukashi, akamulubule shii kilema kumpala kwa A Yikalayika ; 2 akatenteka eyaasa diaye ku mutwe wa mulambu waye, n’akamutshiindja mudibu ku kitwelelo kia shibo y’efumankeeno ; na baana ba Alone, ba tshiite-mwakwidi, abakamiamina mase [a yawa nyema] pa kilambwilo, mpese yoso. 3 Na akalubula, ku [kiakia] kitapilo kia kufukama, [kingi] kitapilo kishiikilwe A Yikalayika ku kaalo : mwimu upuute muunda, na mwimu ooso ulaande muunda [ku mala], 4 na bikuba [bioso] bibidi bia fiyo na mwimu wibilaande, wawa wi ku mulaala fiyo, na lulaando lwa mwimu lulaande eshimba difiita, alukakulumunwa kumune mpaa na ku bikuba bia fiyo ; 5 na baana ba Alone abakebishiikakaalo pa kilambwilo, panundu pa kitapilo kia kushiikwa kaalo kii pa tente yilamikwe pa kaalo : [kiakia] nyi nkitapilo kia ku kaalo, eshiko di mapembwe e buwa kwi A Yikalayika. *(1) Kino kitapilo abekitanyina na bu « kitapilo kia lutumbu, sunga kia kulombana n’Efile Mukulu. 6 Na su mulambu waye bwa kitapilo kia kufukama walambula A Yikalayika ngwa ku bimunwanga bipeela, mulume sunga mukashi, akamulubule shii kilema. 7 Su mmwana a mukooko alubula bwa mulambu waye, akamulubula kumpala kwa A Yikalayika ; 8 akatenteka eyaasa diaye ku mutwe wa mulambu waye, n’akamutshiindja mudibu kumpala kwa shibo y’efumankeeno ; na baana ba Alone abakamiamina mase pa kilambwilo, mbwipi mooso. 9 Na [kwakwa] ku kitapilo kia kufukama, akekukaasha kitapilo kia kushiikwa ku kaalo, alubule kwi A Yikalayika : mwimu waye, mukila aukashimunwa ushima mpaa na kufudiile moongo, na mwimu upuute muunda, na mwimu ooso ulaande muunda [ku mala], 10 na bikuba bioso bibidi bia fiyo, na mwimu wibilande, wawa wi ku mulaala fiyo, na lulaando lwa mwimu lulaande eshimba difiita, alukakulumunwa kumune mpaa na ku bikuba bia fiyo ; 11 na tshiite-mwakwidi anaangye bianka pa kilambwilo : [Nyi] mukate wa kitapilo kia ku kaalo bwa A Yikalayika. 12 Na su mulambu waye nyi nyema a mbushi, akamulubula ku mpala kwa A Yikalayika ; n’akamutenteka eyaasa diaye ku mutwe, 13 akamutshindjile mudibu kumpala kwa Shibo y’efumankeeno ; na baaba ba Alone abakamiamina mase ku kilambwilo, mbwipi mooso ; 14 na ku [yawa mbushi] akekulubula mulambu bino bintu bu kitapilo kia ku kaalo bwa A Yikalayika : mwimu upuute muunda, na mwimu ooso ulaande muunda [ku mala], 15 na bikuba [bioso] bibidi bia fiyo, na mwimu wibilaande, wawa wi ku mulaala fiyo, na lulaando lwa mwimu lulaande eshimba difiita, alukakulumunwa kumune mpaa na ku bikuba bia fiyo ; 16 na tshiite-mwakwidi akebishiika [bioso] kaalo pa kilambwilo : [Nyi] mukate wa kitapilo kia ku kaalo, akituusha eshiko di mapembwe e buwa. Mwimu ooso ngwa A Yikalayika. 17 Uno nyi mwiiya2 wa losoo, mu bipungo bienu, mu mashibo mwenu : tanwanadie mwimu [wa nyema] sunga mmase nya. *(2) Sunga’shi : Kino nkishila. 4 Chapitre 4 1 NaYepowa besaambile na Mose, aamba’shi : 2 Esaambe na baana ba Isalele, webalungule’shi : Su muntu basoolo bubi kushii kuwuka pa kutupilwa umune wa ku miiya ya A Yikalayika mu bintu bishii bilombeene kukitshiibwa, na basoolo umune wa ku biabia bintu : 3 su [yawa muntu nyi] ntshite-mwakwidi mushiingwe mwimu balwisha muyiile kilubilo kikampanda kwi mwi, paapa akalubula kwi A Yikalayika, pa mwanda wa bubi bwaye bubakitshi, mwana a ngombe mulume shii kilema, bu kitapilo ku mwanda wa bubi. 4 Akatwala [yawa mwana a] ngombe mulume ku kitwelelo kia shibo y’efumankeeno, kumpala kwa A Yikalayika ; n’akatenteka eyaasa diaye ku mutwe wa ngobe, akatshiindje mudibu wa ngombe kumpala kwa A Yikalayika ; 5 Na tshiite-mwakwidi mushiingwe mwimu aate aa mase a ngombe, eatuule mu shibo y’efumankeeno ; 6 na tshiite-mwakwidi akasabika munwe waye mu mase, na akamiamina mase misuusa musambobidi, kumpala kwa A Yikalayika, kwakwa kumpala kwa kilamba [kia lushiko] lwa mbalo yi selele1 ; 7 na tshiite-mwakwidi akeela mase ku nsengwa ya kilambwilo kia bukula bwa malaashi bwi mapembwe kii mwamwa mu shibo y’efumankeeno, kumpala kwa A Yikalayika ; na aa mase oso a ngombe akeapongoola paashi ku kitako kia kilambwilo kia kushiikilwa bitapilo kii ku kitwelelo kia shibo y’efumankeeno. 8 Na mwimu ooso wa ngombe a kitapilo ku mwanda wa bubi, akeukatusha : mwimu upuute muunda, na mwimu ooso ulaande muunda [ku mala], 9 bikuba [bioso] bibidi bia fiyo, na mwimu wibilaande, wawa wi ku mulaala fiyo, na lulaando lwa mwimu lulaande eshimba difiita, alukakulumunwa kumune mpaa na ku bikuba bia fiyo, 10 Nka biabia biabebikatusha ku ngombe a kitapilo kia kufukama : na tshiite-mwakwidi ebinaangye pa kilambwilo kia kitapilo kia kushiikwa. 11 Na musokya wa ngombe na mwiita waye ooso, na mutwe waye, na biooko2 biaye, na [bia] muunda mwaye, na tufi3 twaye, 12 ngombe ooso, abakamutwala paasha pa kibundji4, mu mbalo yi bisumanga, kwakwa kwabasukumun buto, na abakamushiika kaalo pa nteete, ku kaalo ; akashiikilwa kaalo pa mbalo yabasumbwila buto. *(1) Sunga’shi : Mu kadiimbo ke kishila. — (2) Sunga’shi : bikona. — (3) Sunga’shi : busala. — (4) Sunga’shi : Paasha pa musuumba. 13 Su kakongye kooso ka [beena] Isalele kasoola bubi kushii kuwuka5 na wawa mwanda namu wekala ufiibwe ku meeso kwa kakongye, na su bakita kintu kishii bia kukitshiibwa, ku umune wa ku miiya ya A Yikalayika yoso, na biabia babapiila, 14 su bubi bubabasoolo [pa kutupilwa mwiiya] bubawukiibwa, paapa kakongye akakalubula mwana a ngombe mulume bu kitapilo ku mwanda wa bubi, na abakamutwala kumpala kwa shibo y’efumankeeno ; 15 na bakulu ba kakongye abakatenteka maasa aabo ku mutwe wa [yawa] ngombe, kumpala kwa A Yikalayika ; bakatshiindje mudibu wa ngombe kumpala kwa A Yikalayika. 16 Na tshiite-mwakwidi mushiingwe mwimu akatwala mase a ngombe mu shibo y’efumankeeno ; 17 na tshiite-mwakwidi akasabika munwe waye mu mase, na akeamiamina misuusa musambobidi, kumpala kwa A Yikalayika, kwakwa kumpala kwa kilamba kia lushiko ; 18 n’akeela mase ku nsengwa ya kilambwilo kii kumpala kwa A Yikalayika, mu shibo y’efumankeeno  n’akapongoola mase ooso paashi ku kitako kia kilambwilo kia kushiikilwa bitapilo kii ku kitwelelo kia shibo y’efumankeeno. 19 Na akakatusha mwimu ooso, eunaangye pa kilambwilo : 20 akakita na uno ngombe’nka biabia bikitshiibwe na ngombe a [kitapilo] ku mwanda wa bubi ; akakitshi’nka biabia bwa uno [ngombe]. Na tshiite-mwakwidi akebakitshiina mushiinga wa kubwikiila milwisho y’abo, na [bubi] abukebalekyelwa6. 21 Na abakasemuna ngombe bamutwale paasha pa kibundji7, na abakamushiika kaalo’nka biabia biabashiikile ngombe a kwibedi : nyi nkitapilo ku mwanda wa [kulekyelwa kwa] bubi bwa kakongye. *(5) Sunga’shi : Kushii kutuundula. — (6) Tala Bibadiko, 15. 25. — (7) Sunga’shi : Paasha pa musuumba. 22 Su [muntu e bu] fumu8 basoolo bubi, na bakitshi kintu kishii bia kukitshiibwa, aye kushii kuwuka, pa kutupilwa umune wa ku miiya yoso ya A Yikalayika, Efile Mukulu aaye, na bapiila, 23 su babamuleesha bubi bwa bubakitshi, biabia akatwala bwa mulambu waye mbushi mulume shii kilema ; 24 n’akatenteka eyaasa diaye ku mutwe wa [yawa] mbushi mulume, akamutshiindjile pa mbalo pabatshiindjila kitapilo kia kushiikwa kaalo kumpala kwa A Yikalayika : nyi nkitapilo ku mwanda wa [kulekyelwa kwa] bubi. 25 Na tshiite-mwakwidi akaata na munwe waye aa mase a kitapilo ku mwanda wa [kulekyelwa kwa] bubi, eashiingye ku nsengwa ya kilambwilo kia kushiikilwa bitapilo, na akeapongoola paashi ku kitako kia kilambwilo kia kushiikilwa bitapilo ; 26 kunyima anaangye mwimu ooso pa kilambwilo, nka bu [abikitwa na] mwimu wa kitapilo kia kufukama ; na tshiite-mwakwidi akamukitshiina mushiinga wa kubwikiila milwisho [bwa kumusuula] ku bubi bwaye, na [bubi] abukamulekyelwa. *(8) Sunga’shi : muntu e bu mutwe wa kifuko. 27 Na su muntu a munkatshi mwa mwiilo mwiumbo basoolo bubi kushii kuwuka, pa kukita kiakia kishii bia kukitshiibwa, na kutupilwa umune wa ku miiya ya A Yikalayika, na bapiila, 28 su babamuleesha bubi bwaye bubakitshi, biabia akatwala mulambu waye, mbushi mukashi shii kilema, bwa bubi bwaye bubakitshi ; 29 n’akatenteka eyaasa diaye ku mutwe wa kitapilo ku mwanda wa [kulekyelwa kwa] bubi, na akatshiindjila mudibu wa kitapilo ku mwanda wa [kulekyelwa kwa] bubi pa yaya mbalo [pabatshiindjila] kitapilo kia kushiikwa ku kaalo. 30 Na tshiite-mwakwidi akaata na munwe waye aa mase [a mbushi], akeashiingye ku nsengwa ya kilambwilo kia bitapilo bia kushiikwa ku kaalo, na akapongoola aa mase ooso paashi ku kitako kia kilambwilo. 31 Na akakatusha mwimu ooso, nka biabia bikatwiishwe mwimi wa [nyema] a kitapilo kia kufukama ; na tshiite-mwakwidi eunaangye pa kilambwilo, utuushe eshiko di mapembwe e buwa bwa A Yikalayika ; na tshiite-mwa, akamukitshiina mushiinga wa kubwikiila milwisho, na [bubi] abukamulekyelwa. 32 Na su batwala mwana a mukooko bwa mulambu waye wa kitapilo ku mwanda wa [kulekyelwa kwa] bubi, wawa [mukooko] wikale ukashi ushii kilema wadia kutwala ; 33 akatenteka eyaasa diaye ku mutwe wa kitapilo ku mwanda wa [kulekyelwa kwa] bubi, n’akeutshiindjia mudibu bu kitapilo ku mwanda wa [kulekyelwa kwa] bubi pa yaya mbalo pabatshiindjila kitapilo kia kushiikwa ku kaalo. 34 Na tshiite-mwakwidi akaata, na munwe waye, aa mase a kitapilo ku mwanda wa [kulekyelwa kwa] bubi eashiingye ku nsengwa ya kilambwilo kia kushiikilwa bitapilo, na akapongoola mase ooso paashi ku kitako kia kilambwilo. 35 Na akakatusha mwimu ooso’nka biabia biikele bikatushwe mwimu wa mwana a mukooko a kitapilo kia kufukama ; na tshiite-mwakwidi eunaangye pa kilambwilo, paapa panundu pa bitapilo bia A Yikalayika bishiikwe ku kaalo ; na tshiite-mwakwidi akamukitshiina mushiinga wa kubwikiila milwisho, bwa bubi bwaye bubaakitshi ; na [bubi] abukamulekyelwa. 5 Chapitre 5 *1 Su muntu basoolo bubi pa kukita’shi, aye mwikale kamoni, na mupwe kupusha eyi1 dia tumilaadi adimusendeela, aye mumone sunga muwukye mwanda, apele kwiubweela, papa akasemuna bushito bwa bubi bwaye ; — 2 sunga’shi su muntu mmukume kintu kii butete kioso, su kyekala kitaanda kia nyema a kisuku mufwe e butete, sunga kitaanda kia nyema a paasha mufwe e butete, sunga kitaanda kia nyema ekakaa2 e butete, na wawa mwanda wekala kwadi ngufiame, paapa aye e butete na mmupiile ; — 3 sunga’shi bakumu butete bwa muntu, butet bwa yawa muntu sunga bwekala namini bumwikashwe bu e butete, na wawa mwanda wekala kwadi ngufiame, pakawuka wanka, akekashwa mupiile ; — 4 sunga’shi muntu, su mmukwakula kwaye kukanwa mmulenguule, batshipi katshipo ka kukita bibi sunga mbiya, muyiile kiakia kioso akituusha muntu kukanwa kwaye mu kulenguula na katshipo, na wawa mwanda wekala kwadi ngufiame, pakawuka wanka, paapa mmupiile ku umune wa yaya mianda. 5 Abikakitshika’shi, su mmupiile ku umune wa ku yaya mianda, akasokole kiakia kiini kiadi mulwishe ; 6 na [kunyima] akatwala kwi A Yikalayika kitapilo kiaye kia kupishiibwa, bwa bubi bwaye bubakitshi, nyema mukashi a munkatshi mwa bimunwanga bipeela, su mmukooko su mmbushi, bu kitapilo kiaye ku mwanda wa [kulekyelwa kwa] bubi ; na tshiite-mwakwidi akamukitshiina mushiinga wa kubwikiila milwisho [bwa kumusuula] ku bubi bwaye. *(1) Babakitanga’shi, muntu oso kamoni su e ku tumilaadi bwa kubweela kiadi mumone na kiadi mupushe, su eele mpaka, abamweele “eyi” dia kumusendeela nadio. Tala Nkidji. 29. 24. — (2) Nyema ekakaa, sunga’shi akalaba : Bu nyoka na mabieembia. 7 Na su ku maboko kwaye te bia koobesha mwana a mukooko3, akatwadila A Yikalayika, bwa bubi bwa kupishiibwa bubakitshi, tooni twa tukutshikutshi tubidi sunga baana ba nkudiimba babidi, umune bwa nkitapilo ku mwanda wa [kulekyelwa kwa] bubi, na ungi [mwana] bwa kitapilo kia kushiikwa ku kaalo. 8 Akatwala [twatwa tooni] kwi tshiite-mwakwidi, na tshiite-mwakwidi akalubula yawa [mwana a nkudiimba] akukita n’aye nkitapilo ku mwanda wa [kulekyelwa kwa] bubi kwibedi, na akamutukula mutwe na ngala yaye peepi na nshingo, anka t’akamulamuuna pabidi nya ; 9 na [kunyima] akamiamina mase a kitapilo ku mwanda wa [kulekyelwa kwa] bubi ku lupese lwa kilambwilo, na aa mase aakashaala, akeafiina paashi ku kitako kia kilambwilo : nyi nkitapilo ku mwanda wa [kulekyelwa kwa] bubi. 10 Na yawa [mwana a nkudiimba] a kabidi, akakita n’aye kitapilo kia kushiikwa ku kaalo muyiile mwiiya. Na tshiite-mwakwidi akamukitshiina mushiinga wa kubwikiila milwisho [bwa kumusuula] ku bubi bwaye bwadi mukite, na [bubi] abukamulekyelwa. *(3) Sunga koobesha mwana a mbushi. 11 Na su ku maboko kwaye te bia koobesha tukutshikutshi tubidi sunga baana ba nkudiimba babidi, papa yawa bakitshi bubi akatwala bwa mulambu waye kimune kia mu bipindji ekumi bia mbaafu4 a bukula bwi soo bu kitapilo ku mwanda wa [kulekyelwa kwa] bubi ; takekutenteka mwimu, na tekekutenteka kabaanda nya ; mwanda [kino] nyi nkitapilo ku mwanda wa [kulekyelwa kwa] bubi. 12 Na [bwabwa bukula] akebutwala kwi tshiite-mwakwidi, na tshiite-mwakwidi namu asune mwanka eyaasa diwule [dia bukula] bu kitentekyesho, ebunaangye pa kilambwilo panundu pa bitapilo bia ku kaalo bwa A Yikalayika : nyi nkitapilo ku mwanda wa [kulekyelwa kwa] bubi. 13 Na tshiite-mwakwidi akamukitshiina mushiinga wa kubwikiila milwisho, bwa bubi bwaye bubakitshi ku umune wa ku yaya mianda, na [bubi] abukamulekyelwa ; na [bwawa bukula abushaala] abukekala bwa tshiite-mwakwidi, anka biabia bi mulambu wa kituumbula. *(4) Mbaafu, abetanyina’shi, épha, atwela litres makumi asatu. Mu bukula bii pangi bilo bibidi na kipindji. 14 Na A Yikalayika besaambile na Mose, aye nkwamba’shi : 15 Su muntu bakutwa kishima na basoolo bubi kushii kuwuka mu bintu bi selele bia A Yikalayika, akatwala kitapilo kiaye kia kupishiibwa kwi A Yikalayika, kipanga kia mukooko ulume ushii kilema, watshiibwe munkatshi mwa bimunwanga bipeela, muyiile kupwandjikisha koobe kwa mu shikele5 ya fwalang, muyiile shikele ya mu shibo y’Efile Mukulu yii selele, bu kitapilo kia kupishiibwa. 16 Na pabitale namu kwakwa kusoolo kwa [pa kwaata] kintu kii selele, akekialusha, na kwikutenteka kipindji kimune kia mu bitano panundu, akekipe tshiite-mwakwidi ; na tshiite-mwakwidi akamukitshiina mushiinga wa kubwikiila milwisho na wawa mukooko ulume wa kitapilo kia kupishiibwa ; na [bubi] abukamulekyelwa. *(5) Shikele : Nyi nkipipo kibabapimanga bushito. Tala Kikatukilo 30. 13, na Lefitike 27. 25. 17 Na su muntu basoolobubi, kushii kuwuka, na bakitshi kintu kishii bia kikitshiibwa kitale ku umune wa ku miiya yoso ya A Yikalayika, eekala mupiile, na akasemuna bushito bwa bubi bwaye. 18 Na akatwala nyema a mukooko mulume shii kilema kwi tshiite-mwakwidi, wa munkatshi mwa bimunwanga bipeela, muyiile kupwandjikisha koobe, bu kitapilo kia kupishiibwa ; na tshiite-mwakwidi akamukitshiina mushiinga wa kubwikiila milwisho, ku mwanda wa kilubilo kiaye kibakitshi kushii kuwuka ; na [bubi] abukamulekyelwa. 19 [Kiakia] nyi nkitapilo kia kupishiibwa ; eyendo yawa muntu beyikasha nebene mupishiibwe kumpala kwa A Yikalayika. 20 Na A Yikalayika besaambile na Mose, aye nkwamba’shi : 21 Su muntu basoolo bubi, na bakutwa kishima kwi A Yikalayika, na badiimbi mwinaye ku kintu ku kintu kiabadi bamupe, sunga kiabadi batuule mu maasa mwaye [bwa kulama], sunga kintu kiadi mwibe, sunga nkunyenga mwinaye kintu pa bukopo ; 22 sunga’shi basangula kintu kishimine, na badiimbi madimi ku wawa mwanda, na su taadi atshipi kutshipa kwa madimi ku umune wa yaya mianda yoso ayikita muntu mu kipaso kia kulwisha pa kwiyikita ; 23 paapa, su balwisha na bekala mupiile, abikakitshika’shi aye aalushe kiakia kintu kiadi mwibe, sunga [kiakia] kintu kiadi munyengye pa bukopo, sunga shibo ya bintu yibaadi yimupeebwe bulami, sunga nkitu kishimine kibasangula, 24 sunga kiakia kioso kiadi mutshipile katshipo ka madimi ; akaalusha kintu kinabene, na kutenteka kimune kia mbitano panundu ; akekipa yawa sha n’akio, mu diadia efuku dia kitapilo kiaye kia kupishiibwa. 25 Dingi, bwa A Yikalayika, akatwala nkitapilo kiaye kia kupishiibwa kwi tshiite-mwakwidi, nyema a mukooko mulume shii kilema, mwatshiibwe munkatshi mwa bimunwanga bipeela, muyiile kupwandjikisha koobe, bu kitapilo kia kupishiibwa. 26 Na tshiite-mwakwidi akamukitshiina mushiinga wa kubwikiila milwisho kumpala kwa A Yikalayika ; na [bubi] abukamulekyelwa, sunga wawa mulwisho wekala namini wadi mukite wiini ubamwikasha mupishiibwe. 6 Chapitre 6 1- Na A Yikalayika besaambile na Mose, aye nkwamba’shi : 2 Kamikila bakamikile Alone na baana baaye balume, webalungule’shi : Uno nyi mwiiya kitapilo kia kushiikwa ku kaalo : Nyi nkitapilo kia kushiikwa ku kaalo : akikeekala pa mufuwa panundu pa kilambwilo bufuku bushima mpaa na ku namashika ; na kaalo ka kilambwilo akakekishiika. 3 Na tshiite-mwakwidi akafwala musapi waye wa lin , na pa mbidi paaye akafwala tuputula twaye twa muushi twa lin, na akabwaa buto1 bwa kitapilo kia kushiikwa ku kaalo kibaabapu kubutula kwi kaalo pa kilambwilo, akebutuule mbwipi mwa kilambwilo ; 4 na kunyima akakaasha bilamba biaye afwale bimo bilamba, na akasemuna âte bwabwa buto ebutwale paasha pa kibundji2 [akebweele] mu mbalo yi selele3. 5 Na kaalo ke pa kilambwilo akakepateemba ; tabekalekanga kaashima nya. Na tshiite-mwakwidi akateembesha nteete pa kaaka [kaalo] namashika ooso, n’akepaloonga kitapilo kia kushiikwa ku kaalo, n’akepashiikila miimu ya bitapilo bia kufukama. 6 Kaalo akakashadidiila ‘nka akateembe pa kilambwilo, tabekalekanga kaashima nya. *(1) Buno buto ta mbwabwa bwa bisumanga nya, mbwabwa bwii na bifingifingi bia mwiita utaate. — (2) Sunga’shi : Paasha pa musuumba. — (3) Sunga’shi : Mbalo yitoshiibwe. 7 Na mwiiya wa mulambu wa kituumbula nguno : [Mwana umune] a ku baana ba Alone akeulubula kumpala kwa A Yikalayika, kumpala kwa kilambwilo. 8 Akasunu eyaasa diwule dia bukula bwi soo bwa kituumbula na mwimu wi mwanka, na kabaanda kooso ke pa kituumbula, n’akashiika biabia bintu pa kilambwilo, bu kitentekyesho kia mulambu kwi A Yikalayika, akituusha eshiko di mapembwe e buwa kwi A Yikalayika. 9 Bwabwa bukula abushaala [ku mulambu], Alone na baana baaye abakebudia ; abakebudia kushii kwela kitatusho, mu mbalo yi selele ; abakebudiila muunda mwa lupoopo lwa Shibo y’efumankeeno. 10 Tabakebuteekanga na kitatusho. Kiakia nyi nkipese kiabo kinanebapa ku bitapilo biande bia kushiikwa ku kaalo. Nyi nkintu kikile selele, bu bii kitapilo kia [kulekyelwa kwa] bubi na bii kitapilo kia kupishiibwa. 11 Mwana ooso mulume a munkatshi mwa baana ba Alone akadia bwabwa bukula : [nyi] mwiiya aushadidiila losoo mu bipungo bienu, [kiabo kipese] kia ku bitapilo bishiikilwe A Yikalayika ku kaalo : ooso a kwibikuma4 akeekala mulamuunwe selele. *(4) Ngi kwamba’shi : Yawa akakuma bitapilo. 12 Na A Yikalayika besaambile na Mose, aye nkwamba’shi : 13 Mulambu wa Alone na wa baana baaye balume, wabakalubwiila A Yikalayika, p’efuku dia kushiingwa kwaye kwa mwimi nguno : kipindji kimune kia mwikumi kia mbaafu5 a bukula bwi soo, bu mulambu wa kituumbula w’efuku dioso, kia pankatshi [kia bwabwa bukula] ku namashika, kingi namu ku kioolwa. 14 Wawa mulambu abakeulumbulwila mwilata na mwimu ; okafikye nao ufuuntwe [mu mwimu] ; okalubula tutuumbula-tutuumbula tuteekye twa [kiakia] kituumbula tutuushe eshiko di mapembwe e buwa kwi A Yikalayika. 15 Na tshiite-mwakwidi a munkatshi mwa baana baaye akeekala mushiingwe mwimu pa mbalo yaye, ngi akakita biabia ; [nyi] mwiiya aushadidiila losoo : abakekishiikila A Yikalayika kaalo kioso kishima. 16 Na kituumbula kioso kia tshiite-mwakwidi akikashiikwa kioso kishima mu kaalo ; t’akikadiibwa nya. *(5) Mbaafu, abetanyina’shi, épha, atwela litres makumi asatu. Mu bukula bii pangi bilo bibidi na kipindji. 17 Na A Yikalayika besaambile na Mose, aye nkwamba’shi : 18 Esaambe na Alone na baana balume, webalunguleshi : Mwiiya wa kitapilo ku mwanda wa [kulekyelwa kwa] bubi nguno : pa yaya mbalo pabakatshiindjila mudibu wa kitapilo kia kushiikwa ku kaalo, ngi apakatshiindjilwa kitapilo ku mwanda wa [kulekyelwa kwa] bubi kumpala kwa A Yikalayika : Nyi nkintu kikile selele. 19 Yawa tshiite-mwakwidi ekilambula ku mwanda wa [kulekyelwa kwa] bubi akekidia ; abakekidiila mu mbalo yi selele, muunda mwa lupoopo lwa Shibo y’efumankeeno. 20 Muntu ooso akakumu mwiita wakio akeekala selele ; na su mase abanokyela ku kilamba, kiakia kioso akinokyelwa na mase, okekisulwile mu mbalo yi selele ; 21 na lweso lwa buma lwabateekyela [wawa mwita] lutanyiibwe ; anka su mbeuteekyele mu lweso lwa bilonda, bakelukumune na kwilusuula na meema. 22 Mwana ooso mulume a munkatshi mwa ba tshiite-mwakwidi akeudia : Nyi nkintu kikile selele. 23 Kitapilo su nkimune kia [kulekyelwa kwa] bubi kiabatweesha mase aakio mu shibo y’efumankeeno bwa kukita mushiinga wa kubwikiila milwisho mu kadiimbo ke selele, takidiibwanga nya ; akikashiikwa ku kaalo. 7 Chapitre 7 1 Na mwiiya wa kitapilo kia kupishiibwa ; Nyi nkintu kikile selele. 2 Pa mbalo yabatshiindjila mudibu wa kitapilo bia kushiikwa ku kaalo, ngi pabakatshiindjila mudibu wa kitapilo kia kupishiibwa, na abakamiamina mase a [yawa nyema a kitapilo] pa kilambwilo mbwipi mooso. 3 N’abakalubula mwimu ooso wa nyema, na mukila, na mwimu upuute muunda, na mwimu ooso ulaande muunda [ku mala], 4 na bikuba [bioso] bibidi bia fiyo na mwimu wibilaande, wawa wi ku mulaala fiyo, na lulaando lwa mwimu lulaande eshimba difiita, lwabakakulumuna kumune mpaa na ku bikuba bia fiyo. 5 Na tshiite-mwakwidi akebishiika [bioso] kaalo pa kilambwilo, bu [abishiikwa] kitapilo kishiikilwe A Yikalayika ku kaalo : nyi nkitapilo kia kupishiibwa. 6 Mwana ooso mulume a munkatshi mwa ba tshiite-mwakwidi akekidia ; akikadiibwa pa mbalo yi selele : nyi nkintu kikile selele. 7 Nka bi kitapilo ku mwanda wa [kulekyelwa kwa] bubi, ngi bii na kitapilo kia kupishiibwa : kwi’nka mwiiya umune bwa biabia bitapilo : nkwamba’shi nkia yawa tshiite-mwakwidi baakitshi nakio mushiinga wa kubwikiila milwisho. — 8 Na pa bitale yawa tshiite-mwakwidi akalubula kitapilo kia kushiikwa ku kaalo kia muntu, musokya wa yawa nyema abalubula aukekala wa tshiite-mwakwidi : [musokya] ngwaye. 9 Na mulambu ooso wa kituumbula wabakateekyela muunda mwa mafuwa sunga uteekyelwe mu mpanu sunga p’elata, wawa mulambu aukekala wa yawa tshiite-mwakwidi yawa akeulubula : [wawa mulambu] nyi ngwaye. 10 Na mulambu ooso wa kituumbula ufuuntwe mu mwimu na uume aukekala wa baana booso balume ba Alone, awikala wa umune sunga wa mungi mwana. 11 Na mwiiya namu wa kitapilo kia kufukama kiabakalubwiila A Yikalayika nguno : 12 su muntu bekilubula bu [kitapilo pa mwanda] wa lutumbu, biabia akalubula [pamune na nyema a kitapilo], bituumbula bishii na kitatusho bifuuntwe mu mwimu, na ma ngalete ashii na kitatusho ashiingwe mwimu, na bukula bwi soo busaangye [ na mwimu]. 13 bwa mulambu waye akalubula, kumune na bituumbula, mikate itutumishwe [na kitatusho] pamune na kyakya kitapilo kia lutumbu lwa kufukama ; 14 na ku wawa mulambu ushima, akalubula kintu kimune bu mulambu waabdi beboshele A Yikalayika : kiini kiakia akikekala kia tshiite-mwakwidi yawa akamiamina mase a kitapilo kia kufukama : nyi nkiaye. 15 Na mwiita wa kitapilo kia lutumbu lwa kufukama aukadiibwa’nka mu diadia efuku diaudi ulubulwe [kwi A Yikalayika] ; tabakalekanga kantu su nkamune ka kwanka mpaa na kunamashika nya. 16 Na su kitapilo kia mulambu waye nyi nkia kwitshipa1, sunga [mmulambu] wa p’eshimba, kitapilo kiaye akikadiibwa’nka diadia efuku dibekilubwiile ; na biabia bioso abikashaala ku kitapilo abikadiibwa butookye ; 17 wawa namu aukashaala ku mwiita wa kitapilo ngwakushiikwa mu kaalo p’efuku dia kasatu. 18 Anka su muntu adia mwita wa kitapilo kiaye kia kufukama p’efuku dia kasatu, [kitapilo] t’akikekala kikuminiibwe nya ; takikakitshiina’ni yawa mwikilambule kintu nya ; akikekala bu kii butete ; na muntu akekidia akasemuna bushito bwa bubi bwaye. 19 Na mwiita ukume kintu kioso kii butete tawakudiibwa nya : aukediibwa mu kaalo. Anka pa mwanda utale mwiita, muntu ooso e selele akadia mwiita. 20 Na muntu pakii mwikale na butete bwaye, bakadia mwiita wa kitapilo kia kufukama kia A Yikalayika, yawa muntu akakashiibwa munkatshi mwa bakwabo. 21 NA su muntu akuma kini na kini kii butete, butete bwa muntu, su nyema e butete, su nkingi kintu [kioso] kilwile na kii butete, na adia mwiita wa kitapilo kia kufukama kilambulwe A Yikalayika, yawa muntu akakashiibwa munkatshi mwa bakwabo. *(1) Ngi kwamba’shi : kitapilo kia kulombasha mulayilo ubatshipilwe. 22 Na A Yikalayika besaambile na Mose, aye nkwamba’shi : 23 Esaambe na baana ba Isalele, webalungule’shi : Tanwanadia mwimu wa ngombe sunga wa mukooko sunga wa mbushi. 24 Mwimu wa kitaanda kifwe2 sunga mwimu wa [nyema] musaasulwe3 nukafube nao mufubo, anka tanwaneudie nya ; 25 mwanda yawa ooso akadia mwimu wa nyema mulubwiilwe A Yikalayika bu kitapilo kishiikwe mu kaalo, muntu akeudia akakashiibwa munkatshi mwa bakwabo. 26 Dingi tanwanakume kudia mase nya, mu shibo yenu su ngimune, sunga eekala [mase] a toooni, sunga a bimunwanga. 27 Muntu ooso akadia mase su nga kini su nga kini, yawa muntu akakashiibwa munkatshi mwa bakwabo. *(2) sunga’shi : nyema mwifwiile. — (3) Sunga’shi : nyema mwipayibwe na nyema n’e. 28 Na A Yikalayika besaambile na Mose, aye nkwamba’shi : 29 Esaambe na baana ba Isalele, webalungule’shi : Yawa ooso akalubula kitapilo kiaye kia kufukama kwi A Yikalayika akatwadila A Yikalayika mulambu waye, watshiibwe ku kitapilo kiaye kia kufukama. 30 Maasa aaye aakatwadila A Yikalayika bitapilo bishiiskweku kaalo ; akatwala mwimu na kiaadi4 ; [kiakia] kiaadi bwa kwikipuka bu mulambu upukwe kumpala kwa A Yikalayika. 31 Na tshiite-mwakwidi akashiika mwimu mu kaalo pa kilambwilo ; na kiaadi akiikala kia Alone na baana baaye balume. 32 Nukape’ni tshiite-mwakwidi kiooko kia mboko5 yilume kia bitapilo bienu bia kufukama, bu mulambu wibweeshwe. 33 Yawa ooso a ku baana ba Alone akalubula mase na mwimu wa bitapilo bia kufukama akeekala na kiooko kia mboko yilume bu kiaye kipese. 34 Mwanda nemwate kiaadi kipukwe na kiooko kia mboko kibweeshwe bia ku bitapilo bia kufukama bia baana ba Isalele, ngi neebipa Alone, tshiite-mwakwidi, na baana baaye balume, nebieele bu mwiiya aushadidiila losoo, kwi baana ba Isalele. 35 Aa nyi [matalwa] a kushiingwa kwa mwimu kwa Alone na a kushiingwa mwimu kwa baana baaye balume, mu bitapilo bia A Yikalayika bishiikwe mu kaalo, kubanga p’efuku diabebayitanyina bwa kufuba [mufubo wa] bu tshiite mwakwidi kumpala kwa A Yikalayika, 36 kiakia kibaadi A Yikalayika mukamikye bwa kwibapa, ku lupese lwa baana ba Isalele, pa diadia efuku dibebashiingile mwimu ; [nyi] mwiiya aushadidiila losoo mu bipungo biabo. *(4) Sunga’shi : kankunku. — (5) Sunga’shi : epaampa dilume. 37 Biabia ngi bi mwiiya wa kitapilo kishiikwe mu kaalo, wa mulambu wa kituumbula, na wa wa kitapilo ku mwanda wa [kulekyelwa kwa] bubi, na wa kitapilo kia kupishiibwa, na wa kitapilo kia kwipaana [mu mufubo wa bu tshiite mwakwidi], na wa kitapilo kia kufukama, 38 wawa [mwiiya] ubabamikiile Mose kwi A Yikalayika pa mwengye wa Sinai, efuku dibakamikiile baana Isalele bwa kulubula milambu yabo kwi A Yikalayika, mu kabaaka ka Sinai. 8 Chapitre 8 *1 Na A Yikalayika besaambile na Mose, aye nkwamba’shi : 2 Ata Alone pamune na baana baaye balume, na bilamba, na mwimu wa kushiingwa, na mwana a ngombe mulume a kitapilo ku mwanda wa [kulekyelwa kwa] bubi, na mikooko yibalume ibidi, na kiseele kia mikate ishii na kitatusho ; 3 na oyitanyine kakongye ka baana ba Isalele ku kitwelelo kia shibo y’efumankeeno. 4 Na Mose bakitshiine namu’nka biabia bibamukamikiile A Yikalayika, na kakongye namu kabayitanyiinwe kumpala kwa kitwelelo kia shibo y’efumankeeno. 5 Na Mose balungwile kakongye’shi : Pushayi bebakamika A Yikalayika bwa kukita. 6 Na Mose bayitanyine Alone na baana baaye paadi, na bebatumpile meema [ku ngao] ; 7 na bamufwadikile musapi, na bamwanyine mukaba mu kifuka, na bamufwadikile nkandjo, bamupudikile efoode1, aye nkumupombeena mukaba wa efoode, ubamwanyine nao pa mbidi ; 8 na bamulamikile kilamba kia pa kiaadi, aye nkupudika ma Udime2 na Tumime3, Ku kilamba kia pa kiaadi ; 9 na bamutentekyele kituuto4 ku mutwe waye, na kumpala kwa kituuto, batuudile lupete lwa kiamo kia oolo, kintu ki selele kibaadi A Yikalayika mukamikile mose. 10 Na Mose baatshile mwimu wa kushiingwa, beushiingile Nshibo ya misokya ya A Yikalayika na ku bintu bioso bibaadi mwanka, na bebikeeshe selele5 ; 11 na bamiamiine mase mwanka ku kilambwilo misuusa musambobidi6, bashiingile kilambwilo mwimu na bintu bioso abifubilwa7, na kwiloondo mpaa na ku kitako kiadio, bwa kwibiikasha selele8. 12 Na bapongolwele mwimu wa kushiingwa ku mutwe wa Alone, amufikinya, bwa kumwikasha selele. *(1) Efoode : nyi nkilamba kia kishila, kibabafwalanga pa mwanda kwi ba tshiite-mwakwidi. Tala Kikatukilo. 25. 7 ; na 28. 4-14. — (2) Udime : xxxxxxxxxxxxxx. — (3) Tumime : xxxxxxxxx. — (4) Kituuto : kiabetanyina bu tshiaala, babaadi abekifwala bu kilongo ku mutwe kwi tshiite-mwakwidi mukata e panundu. Tala Kikatukilo. 28. 4 ; na Lefitike. 16. 4. — (5) Sunga’shi : kwibilamuuna selele ; kwibiikasha bu bia A Yikalayika. — (6) Tala Lefitike. 4. 6 ; na Kikatukilo. 29. 21. — *(7) Sunga’shi : Biabia bintu bu makopo, malonga na ngyeso. — (8) Sunga’shi : kwibilamuuna selele ; kwibiikasha bu bia A Yikalayika. 13 Na Mose bayitanyine baana baaye ba Alone paadi, bebafwadikile misapi, na bebashitshikile mikaba, na bebatentenkyele tufulu, nka bibaadi A Yikalayika mmukamikile Mose. 14 Na babatwadile kwadi ngombe mulume a kitapilo ku mwanda wa [kulekyelwa kwa] bubi, Alone na baana baaye babatentekyele maasa aabo ku mutwe wa yawa ngombe a kitapilo ku mwanda wa [kulekyelwa kwa] bubi ; 15 babamutshiindjile mudibu, na Mose baatshile mase, na beashiingile na munwe waye ku nsengwa ya kilambwilo, mbwipi mooso, na bekeeshe kilambwilo selele ; na bapongolwele [mase abasheele] paashi ku kitako kia kilambwilo, na bekikeeshe selele, aye nkukita mushiinga wa kubwikiila milwisho yaaye9 16 Baatshile na mwimu ooso ubaadi ulaande muunda [ku mala], na lulaando lwi kwishimba difiita, na bikuba bia fiyo bibidi, na mwimu wayo, na Mose bebishiikile kaalo pa kilambwilo. 17 Ngombe, na musokya waye, na mwiita waye, na tufi twaye, aye nkwibishiika kaalo, paasha pa kibundji, muyiile bibaadi A Yikalayika mukamikile Mose. 18 Na babatwadile kwadi mukooko ulume wa kitapilo kia kushiikwa mu kaalo, Alone na baana baaye babatentekyele maasa aabo ku mutwe wa wawa mukooko ulume ; 19 Bamutshiindjile mudibu, na Mose bamiamiine mase ku kilambwilo, mbwipi mooso ; 20 babasayile wawa mukooko ulume tusuumbwe-tusuumbwe, na Mose bashiikile mutwe mu kaalo, na twatwa tusuumbwe-tusuumbwe, na mwimu ; 21 na babasulwiile muunda na biooko mu meema, na Mose mukooko ooso ku kaalo pa kilambwilo : kibaadi kitapilo kia kushiikwa, akituusha eshiko di mapembwe e buwa, kibaadi kitapilo kia ku kaalo bwa A Yikalayika, muyiile bibaadi A Yikalayika mukamikile Mose. 22 Na babatwadile kwadi mukooko wa kabidi ulume, wawa mukooko wa [kitapilo kia] kwipaana [mu mufubo wa bu tshiite mwakwidi], Alone na baana baaye babatentekyele maasa aabo ku mutwe wa mukooko [wawa ulume] ; 23 babeutshiindjile mudibu, na Mose baatshile mase a wawa mukooko, eashiinga ku soongo y’etwi dibalume dia Alone, na pa kiaala ki’eyaasa dibalume, mpaa na p’ena dikata dya lwao lwaye lubalume ; 24 na bayitanyine baana ba Alone balume paadi, Mose bashiingile mase [a wawa mukooko] ku soongo y’etwi diabo dibalume, na pa kiaala ki’eyaasa diabo dibalume, mpaa na p’ena dikata dya lwao lwabo lubalume , na Mose bamiamiine mase pa kilambwilo, mbwipi mooso. 25 Na baatshile, mwimu, na mukila, na mwimu ooso ubaadi ulaande muunda [ku mala], na lulaando lw’eshimba difiita, na bikuba bia fiyo bibidi mpaa na wayo mwimu, na kiooko kia mboko yibalume. 26 Na baatshile, mwamwa mu kiseele mikate ishii na kitatusho yibaadi kumpala kwa A Yikalayika, kituumbula kishii na kitatusho, na kituumbula kia mukate ufuuntwe mu mwimu, na ma ngalete, bebitentekyele pa mwimu, na pa kiooko kia mboko yibalume ;. 27 na batuule bioso muunda mwa maasa Alone na muunda mwa maasa a baana baaye, na bebipukile bu mulambu upukwe kumpala kwa A Yikalayika. 28 Na Mose bebikatwiishe mu maasa aabo, aye nkwibishiika mu kaalo ku kilambwilo, papa panundu pa kitapilo kia kushiikwa mu kaalo : [kiakia] kibaadi kitapilo kia kwipaana [mu mufubo wa bu tshiite mwakwidi], kia kutuusha eshiko di mapembwe e buwa, kibaadi kitapilo kia ku kaalo bwa A Yikalayika. 29 Na Mose baatshile kiaadi [kia mukooko] aye nkwikipuka bu mulambu upukwe kumpala kwa A Yikalayika ; kia [kiaadi] kibaadi, — kia ku mukooko ulume wa kwipaana [mu mufubo wa bu tshiite mwakwidi], — kipese kia Mose, muyiile bibaabadi bakamikile Mose kwi A Yikalayika. 30 Na Mose baatshile mwimu wa kushiingwa na mase abaadi pa kilambwilo, ebimiamina Alone, pa bilamba biaye, [ebimiamina] mpaa na baana baaye balume na bilamba bia baana baaye balume booso n’aye pamune : balamunwiine Alone selele, [na] bilamba biaye, mpaa na baana baaye balume na bilamba biabo. 31 Na Mose balungwile Alone na baana baaye’shi : Teekyelayi mwiita ku kitwelelo kia shibo y’efumankeeno, anukeudiila kwakwa, bimune na wawa mukate wii mu kiseele kia kwipaana [mu mufubo wa bu tshiite mwakwidi], muyiile biabia binandji mukamikye’shii : Alone na baana baaye balume abakeudia. 32 Na mwiita na mikate abishaala, anukebishiika mu kaalo. 33 Dingi tanukatuuku paasha pa kitwelelo kia shibo y’efumankeeno muunda mwa mafuku musambobidi nya, mpaa na apakalombeena mafuku a kwipaana kwenu [mu mufubo wa bu tshiite mwakwidi] ; mwanda atukatuulu mafuku musambobidi bwanudia kwipaana9. 34 A Yikalayika bakamika bwa kukita’nka bu bino bibakitwa lelo, bwa kwinukitshiina mushiinga wa kubwikiila milwisho yenu. 35 Anukashaala muunda mwa mafuku musambobidi kuno kitwelelo kia shibo y’efumankeeno, kaanya na bufuku, na anukalama kiakia kiabadi benupe kwi A Yikalayika bwa kwikilama, bianusha kufwa ; mwanda bino ngi biabadi bankamikile. 36 Na Alone na baana baaye balume abakitshiine bintu bioso bibaadi A Yikalayika mmukamikye kukidila kwi Mose. *(8) Tala Kikatukilo. 29. 36 ; 30. 10 ; na Beena Ebelo. 5. 1-4. — (9) Tala mu Kikatukilo 28. 41. 9 Chapitre 9 1 Na bibakitshiine’shi, p’efuku dia mwaanda, Mose bayitanyine Alone na baana baaye balume, na bakulu ba beena Isalele ; 2 aye nkulungula Alone’shi : Ata mwana a ngombe mulume a kitapilo ku mwanda wa [kulekyelwa kwa] bubi, na mukooko ulume bwa kitapilo kia kushiikwa ku kaalo, bishii kilema, webilubule kumpala kwa A Yikalayika. 3 Na [kunyima] okesaambe na baana ba Isalele, webalungule’shi : Atayi mbushi mulume a kitapilo ku mwanda wa [kulekyelwa kwa] bubi ; na mwana a ngombe, na mwana a mukooko, bia kipwa kimune, bishii kilema, bwa kitapilo kia kushiikwa ku kaalo ; 4 [baate] ngombe mulume na mukooko ulume bwa kitapilo kia kufukama, bia kutapila kumpala kwa A Yikalayika, na mulambu wa kituumbula kifuuntwe mu mwimu, mwanda A Yikalayika akenumwekyela lelo uno. 5 Na babatwadile biabia bintu bibakamikile Mose kumpala kwa kitwelelo kia shibo y’efumankeeno ; na kakongye kooso kabeseesele peepi, abo nkwimana kumpala kwa A Yikalayika. 6 Na Mose baambile’shi : Ngi kintu kibaadi A Yikalayika mukamikye kino ; ekikiteyi, na ntumbo ya ekikiteyi, na ntumbo ya A Yikalayika ayikenumwenekyela. 7 Na Mose balungwile Alone’shi : Eseese peepi na kilambwilo, olambule kitapilo kiobe ku mwanda wa [kulekyelwa kwa] bubi, na kitapilo kiobe kia kushiikwa ku kaalo, na okite mishiinga wa kubwikiila milwisho ku mwanda oobe na ku mwanda wa mwiilo ; dingi olambule mulambu wa mwiilo, webakitshiine na mushiinga wa kubwikiila milwisho ku mwanda wabo’bo, muyiile bibabakamika kwi A Yikalayika. 8 Na Alone beseesele peepi na kilambwilo, aye nkutshiindja mudibu wa mwana a ngombe mulume a kitapilo ku mwanda wa [kulekyelwa kwa] bubi, yawa baadi aaye’ye nabene ; 9 na baana ba Alone babamulubwidiile mase, aye nkusabika munwe mu mase, nkwiashinga ku nsengwa ya kilambwilo, aye nkupongoola mase paashi ku kitako kia kilambwilo. 10 Na [kunyima] bashiikile mwimu kaalo ku kilambwilo, na bikuba bia fiyo bibidi, na lulaando lwatshiibwe kwishimba difiita dia [kiakia] kitapilo ku mwanda wa [kulekyelwa kwa] bubi, muyiile bibaabadi bebikamikile Mose kwi A Yikalayika. 11 Anka mwiita na musokya, bakebishiikile mu kaalo, paasha pa kibundji. 12 Na batshindjiilemudibu wa nyema a kitapilo kia kushiikwa ku kaalo, baana ba Alone nkumulubwila mase, aye nkwiamiamina ku kilambwilo, mbwipi mooso. 13 Na babamulubwidiile kitapilo kia kushiikwa ku kaalo [kisayibwe] tusuumbwe, na mutwe, na bebishiikile kaalo pa kilambwilo ; 14 na basulwile muunda na mikona, aye nkwibishiika kaalo [bitentekye panundu] pa kitapilo kia kushiikwa ku kaalo paapa pa kilambwilo. — 15 Na [kunyima] balubwile mulambu wa mwiilo : aye nkwata yawa mbushi mulume a kitapilo ku mwanda wa [kulekyelwa kwa] bubi, baadi a mwiilo, bamutshiindjile mudibu, na bamulambwile ku mwanda wa bubi bwabwa bubaadi bwa mwiilo, nka bu bibakitshiine kumpala [na mwana a ngombe]. 16 Na balubwile kitapilo kia kushiikwa ku kaalo, aye nkwibikita muyiile eyi dibakamilwe [kwi A Yikalayika]. 17 Na [kunyima] balubwile mulambu wa kituumbula, na baushiishe eyaasa diaye bukula bwi soo aye nkwibushiika ku kaalo pa kilambwilo, kutentenka kwakwa ku kitapilo kushiikwa ku kaalo kia namashika ooso. 18 Na batshiindjile ngombe mulume na kimpanga kia mukooko bia kitapilo kia kufukama kibaadi kia mwiilo, na baana ba Alone babamulubwidiile mase, aye nkwiamiamina ku kilambwilo, mbwipi mooso 19 Na [babalubwile] miimu ya ngombe na ya kimpanga kia mukooko, mukila na lulaando lupuute [muunda ku mala],na bikuba bia fiyo, na lulaando lw’eshimba difiita ; 20 na babatentekyele miimu yaya pa biaadi [bia nyema], aye nkushiika yaya miimu ku kaalo pa kilambwilo. 21 na Alone bapukile biaadi na kiooko kia mboko ilume bu mulambu upukwe kumpala kwa A Yikalayika, muyiile bibaadi bikamikye Mose. — 22 Na Alone bebosheeshe maasa aaye atadiisha kwi mwiilo aye nkwibeela miabi ; na baalaleele aye baapu kulambula kitapilo ku mwanda wa [kulekyelwa kwa] bubi, na kitapilo kia kushiikwa ku kaalo, na kitapilo kia kufukama. 23 Na Mose na Alone babatwelele mu Shibo y’efumankeeno ; akupu babatuukile beelela mwiilo miabi : na ntumbo ya A Yikalayika yibamwenekyelwe kwi mwwiilo ooso ; 24 na kaalo kabakatukile kwi A Yikalayika katuuka, na kataatshisha kitapilo kia kushiikwa ku kaalo, na mwimu pa kilambwilo ; na mwiilo ubekamwene, na babeelele misaase1 ya mulaa, na babapoone bakupila mapala aabo paashi. *(1) Sunga’shi : babeelele biila bia muloo, sunga tukuunda-kuunda. 10 Chapitre 10 *1 Na baana ba Alone balume, Nadaba na Abiu, babaatshile ku muntu na muntu ka mbabula kaaye [akapukilwa kaalo], babemwelele kaalo, na babatuule kabaanda panundu, babalubwiile kwi A Yikalayika kaalo ka bisumanga1, kintu kiabashibaadi bebatumine eyi bwa kwikikita. 2 Na kaalo kabakatukile kwi A Yikalayika katuuka kwabadi, kabebapiile, na babafwiile ku meeso kwa A Yikalayika. 3 Na Mose balungwile Alone’shi : Ngi kiini kibesaambile A Yikalayika kiakia, aye nkwamba’shi : Nankekala mulamuunwe selele mwi baaba abeseese peepi n’ami, na kumpala kwa mwiilo ooso nankekala mutumbishiibwe. Na Alone bauminyine’nka nyaa. 4 Mose baitanyine Misheele na Edisafana, baana ba Ushiele, maasaba a nshabo Alone, aye nkwibalungula’shi : Fikayi, katushayi [bitaanda bia] bakwenu kumpala kwa mbalo yi selele nwibatwale paasha pa kibundji2. 5 Abo namu babeseele, bebatuusha paasha pa kibundji mu misapi yabo, nka bu bibaadi biakule Mose. 6 Na Mose balungwile Alone na baana baaye [bangi] balume, Eleasala na Itamala’shi : Tanulekanga ku mitwe kwenu mwaasa na tanusaananga bilamba bienu, kutshiina tala nwakafwa, na’shi tabakwatshilanga kakongye kooso suungu ; anka bakwenu, shibo yoso ya Isalele, abakadila maalo a dino eluungu [dia kaalo] dibabateembesha kwi A Yikalayika. 7 Dingi tanukatukanga kumpala kwa kitwelelo kia shibo y’efumankeeno, kutshiina tala nwakafwa, mwanda mwimu wa kushiingwa wa A Yikalayika wii panudi. N’abo namu babakitshiine nka muyiile eyi dia Mose. *(1) Sunga’shi : kaalo keenyi, kashii ka A Yikalayika. — (2) Sunga’shi : paasha pa musuumba. 8 Na A Yikalayika besaambile na Alone, aye nkwamba’shi : 9 Tanwanatome malufu a finyo sunga maalwa e bukopo nya, obe na baana boobe balume boodi n’abo, kipindji kianukatweela shibo y’efumankeeno, kutshiina tala nwakafwa. [Uno nyi] mwiiya aushadidiila losoo, mu bipungo bienu, 10 bwa’shi nushinguule bia kulamuuna pankatshi pa kiakia kii selele na kiakia kishii selele, na [kushinguula] bia kulamuuna pankatshi pa kipwidikye na kiakia kii butete, 11 na bwa’shi nulambukishe baana ba Isalele booso miiya yaakule A Yikalayika kukidila kwi Mose. 12 Na Mose balungwile Alone, na Eleasala na Itamala, baana baaye balume babasheele’shi : Atayi mulambu wa kituumbula, kiakia kishaale ku bitapilo bia A Yikalayika bishiikwe ku kaalo, nudie wawa mulambu bu mukate ushii na kitatusho, [nwiudiile] mbwipi mwa kilambwilo ; mwanda nyi nkintu kikile selele. 13 Dingi anukeudiila pa mbalo yii selele mwanda kiakia ngi kiobe kipese na kipese kia baana boobe mu bitapilo bia A Yikalayika bishiikwe ku kaalo ; mwanda bino ngi ngi bibabankamikile [kwi A Yikalayika]. 14 Dingi anukadia kiaadi kipukwe na kiooko kia mboko kikaamishwe kwiulu, pa mbalo yii selele, obe na baana boobe balume na baana boobe bakashi boodi n’abo ; mwanda mbinupeebwe bu kiobe kipese na kipese kia baana boobe mu bitapilo bia kufukama bia baana ba Isalele. 15 Abakatwala kiooko kia mboko kikaamishwe kwiulu na kiaadi kipukwe (pamune na bitapilo bishiikwe mu kaalo, biatwamba’shi mmwimu), bwa kwibipuka bu mulambu upukwe kumpala kwa A Yikalayika ; na kiakia akikekala bu kiobe nab u kia baana boobe balume boodi n’abo, bu mwiiya aushadidiila looso, nka bu bibaadi A Yikalayika mukamikye. 16 Na Mose bakokoolwele kalolo ayipusha kwi mbushi a kitapilo ku mwanda wa [kulekyelwa kwa] bubi ; anka talanga, babaadi bapwe kumushiika mu kaalo ; [Mose] bafitshiile Eleasala na Itamala, baana ba Alone balume babasheele suungu, 17 aye nkwibalungula’shi : Bwakini tanwibadiile kitapilo pa mbalo yii selele ? mwanda [akio] nyi nkintu kikile selele ; n’aye [A Yikalayika] mmwinupe kianka bwa kusemuna [bushito bwa] milwisho ya kakongye, bwa kwibakitshiina mushiinga wa kubwikiila milwisho yabo kumpala kwa A Yikalayika : 18 talanga, mase a yawa mbushi tangatwalwe muunda mwa mbalo yi selele nya ; nwii na kituungo kia kumudiila mu mbalo yi selele, bu biandji mwibikamikye. 19 Na Alone balungwile Mose’shi : Talanga, lelo babalubula kitapilo kiabo ku mwanda wa [kulekyelwa kwa] bubi na kitapilo kiabo kia kushiikwa mu kaalo kumpala kwa A Yikalayika, yino mianda namu yibanfikila ; su lelo namu nandjia kudia kitapilo ku mwanda wa [kulekyelwa kwa] bubi, bibaadia kwikala buwa ku meeso kwa A Yikalayika su ? 20 Na Mose bebipushiishe, na biabia bibaadi buwa ku meeso kwaye. 11 Chapitre 11 *1 Na A Yikalayika besaambile na Mose mpaa na Alone, aye nkwabalungula’shi : 2 Esaambeyi na baana ba Isalele, nwibalungule’shi : Nyema yilombeene nwadia, ya munkatshi mwa nyema yoso yii [pano] pa nsenga ngino. 3 Munkatshi mwa nyema ayisankunyuuna [bidiibwa], anukadia nyema ooso ee na mukona ubaale na lwao lubaale looso. 4 Nka peenda ino nyema ayilondo tanukeyidianga, yaya ayisankunyuuna [bidiibwa], yi munkatshi mwayo, na yaya yii na mukona ubaale yi munkatshi mwayo : nyema a shamo, mwanda asankunyuuna [bidiibwa], anka tee na mukona ubaale nya ; mwinwikeele bu e butete : 5 na nyema a nseeshi, mwanda asankunyuuna [bidiibwa], anka tee na mukona ubaale nya ; mwinwikeele bu e butete : 6 na kalulu, mwanda akasankunyuuna [bidiibwa], anka tee na mukona ubaale nya ; mwinwikeele bu e butete : 7 nyema a ngulube, mwanda e na mukoma ubaale na lwao lubaale looso lushima, anka tasankunyuuna [bidiibwa] nya ; mwinwikeele bu e butete. 8 Tanwanadie mwiita wa yaya nyema, na tanwanakume bitaanda byayo nya ; nginwikeele bu yii butete. 9 Anukadia bino, bia munkatshi mwa bipangwa bioso bii mu meema : Anukadia kiakia kioso kii na ngioyoo na maamba, mu meema, mu meema akata na mu mieela. 10 Na kiakia kioso kishii na ngioyoo, na maamba, mu meema akata na mu mieela, ku bintu bioso abitambuka mu meema na nyema ooso e na muwa mu meema, — akikenwikeela bu kintu kii ntoongye. 11 [Eyendo], kiakia akikenwikeela bu kintu kii ntoongye ; tanukadianga mwiita wakio nya, na bitaanda biayo nukeekale nabio ntoongye. 12 Kiakia kioso kii mu meema, kishii na ngioyoo na maamba, akikenwikeela bu kintu kii ntoongye. 13 Na munkatshi mwa tooni, nukeekale na tuno atulondo ntoongye, tabaketudianga nya, akikeekala bu kintu kii ntoongye : muumba na mpungwe, kisaasa-nkanga, kiminyi, 14 kilengalenga, kibembabemba na kooni kôso ke mu kifuko kiako, 15 kidila-ñaña na kooni kooso ka mu kifuko kiakyo, efwifwi, kasabasaba, muwete, eminyi na kooni kooso ka mu kifuko kiadyo, 17 kapulu-kwitshi, kioo, kabusu, 18 yaluswa, kipungulu, mbushi-kooni, 19 esekwe, nkoo na kooni kooso ka mu kifuko kiaye, kapupu mpaa na mudima. 20 Kantu kooso akapapama1 akupu akatambukila pa mikoolo inanka, akakenwikeela bu kintu kii ntoongye. 21 Anka bintu bianudia kudia bia munkatshi mwa bintu abipapama akupu abitambukila pa mikoolo inanka, biabia bintu bii na mabelo kunundu kwa ngao yabio, bwa kusoboka nao pa nsenga. 22 Bia munkatshi mwabio bianukadia mbino : mpasu, mishiindo yayo yoso, na manyenya na myununwa mpaa na nfibo. 23 Anka kintu kioso akipapama, kii na ngao inanka akikenwikeela bu kintu kii ntoongye ; 24 na mu kudia kwa biabia bintu anukeyikashwa bu bee butete : muntu ooso akakumu kitaanda kia biabia bintu akeekala bu e butete mpaa na ku kiolwa ; 25 na muntu ooso akasemuna [kintu kia ku] kitaanda kia’bio akasuula bilamba biaye, na akeekala bu e butete mpaa na ku kiolwa. 26 Nyema ooso e na mukona ubaale, kadi shii na lwao lubaale looso na shasankunyuuna bidiibwa, akenwikeela bu e butete ; muntu ooso akamukuma akeekala bu e butete. 27 Na kintu kioso akitambukila ku misala, munkatshi mwa nyema yoso ayitambukila ku [mikoolo] inanka, akikenwikeela bu i butete ; muntu ooso akakuma kitaanda kiakio akeekala bu e butete mpaa na ku kiolwa ; 28 na yawa ooso akasemuna kitaanda kia kiaki kintu akasuula bilamba biaye, na akeekala bu e butete mpaa na ku kiolwa. [Yaya nyema] ayikenwikeela bu i butete. 29 Na nyema ayikenwikeela bu yi butete munkatshi mwa nyema ayikakaa paashi mu nsenga ngino : mpombo, na mpuku, ebiembia mupuunda bipaso biadio ; 30 kimbudinyindji kia maole, na mukyembia, na muuswebiembia, na noonda, na lufiamino. 31 Yino [nyema] ayikenwikeela bu yi butete munkatshi mwa nyema yoso ayikakaa ; ooso akakuma bitaanda biayo akeekala bu e butete mpaa na ku kiolwa. 32 Na kintu kioso akikapoonwa na kitaanda kiayo, akiikala butete, [bu bino bintu] : kifubilwanga kia mutshi, kilamba, musokya, sunga mufuko, — kintu kioso kia kufuba nakio, akikeelwa mu meema, na akikeekala bu kii butete mpaa na ku kiolwa ; kunyima kwa paapa akikeekala selele ; 33 na lweso looso lwa buma lubapoonwa na kintu, … kiakia kioso kii muunda mwa’lo, akikeekala bu kii butete, anwe namu nutanye lwalwa lweso ; 34 na kintu kioso akidiibwa kibapoona na aa meema, akikeekala butete ; na kitomwanga kioso kiabatoma, mu lweso looso lwalwa mwakidi, akikeekala butete ; 35 na kintu kioso kiakia akikapoonwa na kitaanda kia yino nyema, akikeekala butete ; mafuwa, mpaa’nka na yiini mbalo ayiteekyelwa anukebibuumbula : bii butete, na abikenwikeela bu bii butete ; 36 anka musulo sunga mushimi, eshiba dia meema, abikeekala selele. Anka yawa ooso akakuma kitaanda kia ku yaya nyema akeekala bu e butete. 37 Na su kintu kikampaanda kia ku kitaanda kia yaya nyema kiapoona mbio ya kukuna, yaya mbio ayikeekala bu yi butete ; 38 anka su mbaboombekye yaya mbio ya kukuna mu meema, kiakia kintu namu kia ku kitaanda kia nyema kibeyipoona, yaya mbio ayikenwikeela bu yi butete. — 39 Na su kwafwa nyema a ku nyema yanudiya, ooso akakuma kitaanda kiaye akeekala bu e butete mpaa na ku kiolwa ; 40 na yaawa ooso akukuma kudia mwiita wa kiakia kitaanda akasuula bilamba biaye, na akeekala butete mpaa na ku kiolwa ; na muntu ooso akasemuna kitaanda kia yawa nyema mufwe akasuula bilamba biaye,na akeekala bu e butete mpaa na ku kiolwa. 41 Na nyema ooso ekakaa paashi mu nsenga akeekala bu kintu ki ntoongye ; tabakamudianga nya. 42 Nyema ooso akulubaa mwifu, na nyema atambukila ku [mikoolo] inanka, na yawa shaa mikoolo yi bungi, munkatshi mwa nyema yoso ayikakaa paashi mu nsenga, tanukamudinga nya. 43 Tanwikashanga bikudi bienu ntoongye [pa mwanda wa kudia sunga kukuma] kwa nyema ayikakaa paashi, na tanwiyikasha anwe banabene butete kwayidi, mu kipaso kia’shi anwe nwikashwe butete kwayidi. 44 Mwanda ami ne A Yikalayika, Efile Mukulu eenu : n’anwe nwilamuune selele, mwanda ami ne mwilamuune selele ; anwe namu tanwikashanga bikudi bienu bu bi butete kwi nyema su ngumune ekakaa atambukilanga paashi mu nsenga. 45 Mwanda ami ne A Yikalayika benutushiishe mwiumbo dia Eshipitu, bwa’shi ngikale Efile Mukulu eenu : n’anwe namu anukeekala belamuune selele, mwanda ami ne mwilamuune selele. 46 Biabia ngi bi mwiiya utale nyema na tooni, na kintu kioso kii na muwa akitambukila mu meema, mpaa na kintu kioso [kii na muwa] akikakaa paashi mu nsenga ; 47 biakushinguula pankatshi pa kiakia kii butete na kiakia kii selele, na pankatshi pa nyema adiibwa na nyema shadiibwa. 12 Chapitre 12 *1 Na A Yikalayika besaambile na Mose, aye nkwamba’shi : 2 Esaambe na baana ba Isalele, webalungule’shi : Su mwana mukashi bayimita eyimi na bataanda mwana mulume, akeekala bu e butete [muunda mwa] mafuku musambobidi, akeekala bu e butete anka bu mu mafuku a butete bwa mieeshi yaye. 3 Na p’efuku dia mwaanda abakasala mwiita wa munyonga wa [mwana]. 4 Na akashaala [muunda mwa] mafuku makumi asatu na asatu mu mase a kutoshiibwa kwaye ; takakuma kintu su nkimune kii selele nya, na takafika ku mbalo yii selele [ya A Yikalayika] nya, mpaa na apakalombeena mafuku a kutoshiibwa kwaye. 5 Anka su nyi mwana mukashi abataanda, akeekala bu e butete [muunda mwa] mbingo ibidi, anka bu [mafuku a] kwilamuuna kwaye, na akashaala [muunda mwa] mafuku makumi asamombo na asamombo mu mase a kutoshiibwa kwaye. 6 Na mafuku a kutoshiibwa kwaye paakalombana, bwa mwana mulume sunga mbwa mukashi, akatwala mwana a mukooko a kipwa kimune, kwi tshiite-mwakwidi, ku kitwelelo kia shibo y’efumankeeno, bwa kitapilo kia kushiikwa ku kaalo, na mwana a nkudiimba sunga kakutshikutshi bwa kitapilo ku mwanda wa [kulekyelwa kwa] bubi ; 7 na [tshiite-mwakwidi] akalubula bino bitu kumpala kwa A Yikalayika, akitshiine yawa [mwana mukashi] mushiinga wa kubwikiila milwisho, na akeekala mutoshiibwe ku musololo wa mase aaye. Biabia ngi bi mwiiya wa mukashi ooso bataanda mwana mulume sunga mukashi. 8 Anka su tee na kamweno ka kulombasha bia kupeta mwana a mukooko, akafwiishe tukutshikutshi tubidi sunga baana ba nkudiimba babidi, umune bwa kitapilo kia kushiikwa ku kaalo, mungi bwa kitapilo ku mwanda wa [kulekyelwa kwa] bubi ; na tshiite mwakwidi akamukitshiina mushiinga wa kubwikiila milwisho, n’aye namu akeekala mutoshiibwe selele. 13 Chapitre 13 *1 Na A Yikalayika besaambile na Mose na Alone, aye nkwamba’shi : 2 Su muntu mu kikoba kia mbidi yaye e na ekunu, sunga etapo, sunga ebashi ditookolokye, na bibafiki mu kikoba kia mbidi yaye, eloonda bu dia kifwi1, abakafika n’aye kwi Alone, sunga kwi umune a ku baana baaye balume, ba tshiite-mwakwidi ; 3 na tshiite-mwakwidi akatala diadia eloonda di mu kikoba kia mbidi yaye ; na su bwaa bwi mwiloonda mbwalulukye butooka soo, na su eloonda adimwekwa kampoonko kukila kikoba kiaye, biabia nyi eloonda dia kifwi ; na tshiite-mwakwidi akamumona, amwelele musaase’shi taadi butete. 4 Na su ebashi di mu kikoba kia mbidi yaye nditooka, na su tandikulukile [kampoonko] kukila kikoba kiaye, na su bwaa tambalulukye butooka soo, tshiite-mwakwidi akashitshila [yawa muntu] shaa eloonda muunda mwa mafuku musambobidi ; 5 na p’efuku dya musambobidi, tshiite-mwakwidi akamutala : talanga su eloonda dibayikala’nka biabia ku meeso kwaye mu kipaso kimune, eloonda tandipalakane mu kikoba ; paapa tshiite-mwakwidi akamushitshila dimo muunda mwa angi mafuku musambobidi. 6 Na tshiite-mwakwidi akamutala musuusa wa kabidi, p’efuku dia musambobidi : talanga, eloonda dikwete kwenda na kushimina, n’eloonda tandipalakane mu kikoba nya ; paapa tshiite-mwakwidi akamwelela musaase’shi we selele : nyi etapo [bisumanga] ; n’aye akasuula bilamba biaye, n’ekala selele. 7 Anka su etapo dibapalakana bikata mu kikoba, kunyima kwa’ye bapu kumwekwa kwi tshiite-mwakwidi bwa kutoshiibwa kwaye, abakamutala musuusa wa kabidi kwi tshiite-mwakwidi ; 8 Na tshiite-mwakwidi akamutala : talanga, su etapo dibapalakana mu kikoba ; paapa tshiite-mwakwidi akamwelela musaase’shi e butete : nyi nkifwi. *(1) Kifwi : bangi abetanyina’shi : mbusungu bwa pa mbidi, sunga nsudi. 9 Su kwi eloonda [bu] dia kifwi kwi muntu, abakamutwala kwi tshiite-mwakwidi, 10 na tshiite-mwakwidi akamutala : talanga, kwi ekunu ditooka u kikoba, na diadia ekunu dibaalulusha bwaa bu butooka, na mwamwa mwiloonda mwi mwiita utute mwanka, — 11 nyi [mbusungu] bwa kifwi bubatoondo mu kikoba kia mbidi [bwabwa] ; paapa tshiite-mwakwidi akamwelela musaase’shi we butete, takamushitshila [pa bupenka] nya, mwanda e butete. 12 Anka su kifwi kibapalakana pa kikoba [pooso], na’shi kifwi kibapuutu kikoba kioso kia [yawa] shaa eloonda, kubangila ku mutwe na ku ngao, kipaso kioso kilombeene kumona tshiite-mwakwidi, 13 tshiite-mwakwidi akamumona : talanga, kifwi kibapuutu mbidi yaye yoso ; paapa akeelela [yawa] shaa eloonda musaase’shi we selele : mbidi yaye yoso ishima ibatooko ; e selele. 14 Anka, p’efuku diabakamona mwaadi mwiita atundubuka, akeekala bu e butete. 15 Na tshiite-mwakwidi akatala mwiita utute, n’akamwelela musaase’shi e butete : mwiita utute wi butete, nyi mbusungu bwa kifwi. 16 Anka su yaya mwiita utute ubaaluluka utooka, yawa muntu akafika kwi tshiite-mwakwidi ; 17 na tshiite-mwakwidi akamumona : talanga,, eloonda dibaaluluka ditooka soo ; paapa tshiite-mwakwidi akeelela [yawa] shaa eloonda musaase’shi e selele : mmwikale selele. 18 Na sumbidi ibatapikile eloonda dia kaafukutu, na tadidi dipwe kupaanda, 19 na kunyima, pa yaaya mbalo apeekalanga eloonda pabamwekwa ebubila ditooka, sunga ebashi ditooka dimongolokye, [yawa muntu] akeleesha kwi tshiite-mwakwidi ; 20 na tshiite-mwakwidi akeditala : talanga, su ndipokokye kukila kikoba, na bwaa bwadio tabudi butookye soo ; paapa tshiite-mwakwidi akamwelela musaase’shi e butete : nyi eloonda dia kifwi, kibaapu kupalakana mwiloonda. 21 Na su tshiite-mwakwidi bedimono’shi, mwadidi tamwi bwaa butooka, na’shi tandipokokye kukila kikoba, anka dikwete kushima, tshite-mwakwidi akamushitshile muunda mwa mafuku musambobidi. 22 Na su dibapalakana bikata mu kikoba, paapa tshiite-mwakwidi akamwelela musaase’shi e butete : nyi eloonda. 23 Anka, su ebashi dibashaa mu mbalo yadio kushii kwaluluka, na kushii kupalakana, nyi mukofu wa diadia eloonda dia kaafukutu : tshiite-mwakwidi akamwalela musaase’shi e selele 24 Ungi mwanda su mbidi ibaapi kaalo mu kikoba, n’ebubila dia kaalo dibeekala ebashi ditooka dimongolokye, tshiite-mwakwidi akeditala : 25 talanga, su bwaa bwi mwibashi bubaaluluka butookye soo, n’ebashi adimwekwa ndipokokye kukila kikoba, — nyi nkifwi ; kibaapu kupalakana mwamwa mwibubila dia kaalo ; na tshiite-mwakwidi akamwelela musaase’shi e butete : [diadia] nyi eloonda dia kifwi. 26 Anka su tshiite-mwakwidi bedimono, talanga, tape bwaa butookye soo papa p’ebashi, na’shi tandipokokye kukila kikoba, dikwete kushima, tshiite-mwakwidi akamushitshila muunda mwa mafuku musambobidi ; 27 na p’efuku dia musambobidi, tshiite-mwakwidi akamutala : — su [ebashi] ndipalakane bikatamu kikoba, paapa tshiite-mwakwidi akamwelela musaase’shi e butete : [diadia] nyi eloonda dia kifwi. 28 Anka su ebashi dibashaala mu mbalo yadio kushii kwaluluka, na kushii kupalakana mu kikoba, na’shi dikwete kwenda na kushima, [diadia] nyi ebubila dia kaalo, na tshiite-mwakwidi akamwelela musaase’shi e selele ; mwanda wawa nyi mmukofu w’eloonda dia kaalo. 29 Na su muntu mulume sunga mukashi e n’eloonda ku mutwe sunga ku mieefu1, 30 tshiite-mwakwidi akatala diadia eloonda : talanga, suadimwekwa dipokokye kukila kikoba, mwadidi mwi bwaa bwi [mbidi ya] kisaasa, bupeelepeele, paapa tshiite-mwakwidi akamwelelea musaase’shi e butete : nyi nkiishisepwa2, nyi nkifwi kia ku mutwe sunga kia ku mieefu. 31 Anka, su tshiite-mwakwidi bamono’shi eloonda dia kiishisepwa dibakutwa kwikala dipokokye kukila kikoba, na’shi tamwi bwaa bufiita : paapa tshiite-mwakwidi akashitshila [yawa] shaa eloonda dia kiishisepwa muunda mwa mafuku musambobidi. 32 Na p’efuku dia musambobidi tshiite-mwakwidi akatala eloonda : talanga, su mwiloonda tamwi bwaa bwi kisaasa, na kiishisepwa kibakutwa kwikala kipokokye kukila kikoba, 33 paapa yawa muntu ekuudisha nyeene, anka pa [yaya mbalo] pe kiishisepwa epalekye kushii kukuula ; tshiite-mwakwidi namu akashitshila [yawa] shaa eloonda dia kiishisepwa muunda mwa amo mafuku musambobidi. 34 Na p’efuku dia musambobidi, tshiite-mwakwidi akatala kiishisepwa : talanga, su kiishisepwa kibakutwa kupalakana mu kikoba, na’shi kibakutwa kwikala kipokokye kukila kikoba, paapa tshiite-mwakwidi akamwelela musaase’shi e selele ; na yawa [shaa eloonda] akasuula bilamba biaye, na akeekala selele. 35 Na su kiishisepwa kibapalakana bikata mu kikoba, kunyima kwa kutooshiibwa kwaye, tshiite-mwakwidi akamutala ; 36 na su kiishisepwa nkipalakane mu kikoba, tshiite-mwakwidi takakiimba dimo’shi bwaa bwi kisaasa nya : yawa muntu e butete. 37 Na su kiishisepwa nkishaale pa mbalo yakio kushii kwaluluka, ku meeso kwaye, na bwaa bufiita bubepamene, kiishisepwa nkipwa kupaanda : yawa muntu e selele, na tshiite-mwakwidi akamwelela musaase’shi e selele ». *(1) Sunga’shi : ku kisaa, sunga ku lubangabanga. — (2) Sunga’shi : kiisepela, sunga kikodi. 38 Na su muntu mulume sunga mukashi e na mabashi mu kikoba kia mbidi yaye,mabashi atooka, 39 tshiite-mwakwidi akamutala ; talanga, su mu kikoba kia mbidi yaabo, mwi mabashi atooka, ashaapenyapenya, nyi ebashi dia bisumanga dibapalakana mu kikoba : yawa muntu e selele. 40 Na su muntu atukuka nyeene ya ku mutwe waye, [yawa] sh’ebala : yawa muntu e selele ; 41 na su batukuka nyeene ya ku mutwe waye ya lupese lwa ku mpala, [yawa] nyi sh’ebala dia pa mpala : yawa muntu e selele. 42 Anka su, mwamwa munkatshi mweebala dia mu kabala sunga dia mu mpala, mubamwekwa eloonda ditooka dimoongolokye, nyi nkifwi kiakia kibapalakana pa yaya mbalo yikudikye ebala dia mu kabaala sunga dia mu mpala ; 43 na tshiite-mwakwidi akamutala : talanga, su ebubila di’eloonda dii mbidi yimongolokye mwamwa mu mbalo yikudikye ebala dia mu kabaala sunga dia mu mpala, bu abimwekwa kifwi mu kikoba ; 44 yawa nyi muntu shaa kifwi, e butete ; tshiite-mwakwidi akamwalela musaase’shi e butete : eloonda diaye dii mu mutwe waye. 45 Na yawa shaa kifwi e na eloonda [abituungu] eekale na bilamba biaye bisanukye na mutwe waye wikale mwaasa, dingi apuute mieefu, na kwenda afweelanga musaase’shi : e butete ! e butete ! 46 Kipindji kioso kiakii n’eloonda [pa mbidi] paaye, akeekala e butete ; aye e butete ; akeekala pa bupenka, kiaye kishaleelo akikeekala paasha pa kibundji3. *(3) Sunga’shi : paasha pa musuumba wa beena Isalele. 47 Na su eloonda dia kifwi mu kilamba, mu kilamba kia laine sunga mu kilamba kia lin, 48 sunga mu mpeko ya mbwipi sunga mu mpeko ya mbula bwa [kilamba kia] lin sunga kia laine, sunga ku musokya, sunga ku kintu kikitwe na musokya, 49 Na su eloonda dii buleese sunga dimoongolokye ku kilamba, sunga ku musokya, sunga ku mpeko ya mbwipi, sunga ku mpeko ya mbula, sunga kingi kintu kioso kiakia kikitwe na musokya, [diadia] nyi eloonda dia kifwi, abituungu kukedileesha tshiite-mwakwidi. 50 Na tshiite-mwakwidi akatala eloonda, kunyima akashitshile [kiakia kintu] kish’eloonda muunda mwa mafuku musambobidi ; 51 na p’efuku dia musambobidi, akatala eloonda : — su eloonda dibaatama ku kilamba, sunga ku mpeko ya mbwipi, sunga ku mpeko ya mu bula, sunga ku musokya, [na] ku kintu kioso kiakia kikitwe na musokya, eloonda nyi nkifwi akiteme : kiakia kintu kii butete. 52 Paapa abakashiika kilamba kaalo, sunga mpeko ya mbwipi, sunga mpeko ya mu bula ya [kilamba kia] laine sunga kia lin, sunga [kushiika] kintu kioso kiakia kikitwe na musokya kibasanganiibwa n’eloonda ; mwanda nyi nkifwi akiteme ; kiakia kintu akikashiikwa kaalo. 53 Na su tshiite-mwakwidi bamono, talanga, eloonda tanditame ku kilamba, sunga ku mpeko ya mbwipi, sunga ku mpeko ya mu bula, sunga ku kintu kioso kiakia kikitwe na musokya, 54 paapa tshiite-mwakwidi akatuma eyi’shi basuule kiakia kintu kish’eloonda, n’akekishitshila muunda mwa amo mafuku musambobidi. 55 Na tshiite-mwakwidi akatala, kunyima kwa kupwa kusuula eloonda : talanga, su eloonda tandialulukye mbidi [ya’dio], na tanditama, — kiakia kintu kii butete, okekishiika mukaalo, nyi nkulwishiibwa kwa m’buwa bwa’kio sunga m’bubi. 56 Na su tshiite-mwakwidi batala, bamono’shieloonda dikwete kwenda na kushimina kunyima kwa’bo kupwa kwidisuula, paapa abakeditubula ku kilamba, sunga ku musokya sunga ku mpeko ya mbwipi sunga ku mpeko ya mu bula. 57 Na su [eloonda] dikiadimwekwa dimo ku kilamba, sunga ku mpeko ya mbwipi, sunga ku mpeko ya mu bula, sunga ku kintu kioso kiakia kikitwe na musokya, kiakia nyi nkifwi kibaatama ; okashiika kiakia kintu kish’eloonda mu kaalo. 58 Na kilamba, na mpeko ya mbwipi, na mpeko ya mu bula, sunga kintu kioso [kiakia] kikitwe na musokya kiodi mupwe kusuula, kish’eloonda dibakumuka, akikasuulwa musuusa wa kabidi, na akikeekala selele. 59 Biabia ngi bi mwiiya utale eloonda dia kifwi ku kilamba kia laine sunga kia lin, sunga ku mpeko ya mbwipi, sunga ku mpeko ya mu bula, sunga ku kintu kioso kiakia kikitwe na musokya, bwa kwikitoosha selele sunga nkwikyelela musaase’shi kii butete. 14 Chapitre 14 *1 Na A Yikalayika besaambile na Mose, aye nkwamba’shi : 2 Mwiiya wa [muntu] shaa kifwi, p’efuku dia kutoshiibwa kwaye nguno : 3 abakamufwisha kwi tshiite-mwakwidi ; na tshiite-mwakwidi akatuuka paasha pa kibundji ; na tshiite-mwakwidi akamutala : talanga, su shaa kifwi baapu kupaanda ku [busungu bw’] eloonda dia kifwi ; 4 paapa tshiite-mwakwidi akakamika eyi’shi, baatshile yawa wiini akyebe kutoshiibwa tooni tubidi atutala na twi selele, na mutshi wa mufula, na kilamba kimoonga, na mutshi wa isope ; 5 na tshiite-mwakwidi akakamika eyi’shi batshiindjile mudibu wa kooni kamune panundu pa lweso lwa buma, pa meema a mu musulo1. 6 Pa bitale [kaaka] kooni akatala, akekaata, na [wawa] mutshi wa mufula, na kilamba kimoonga, na mutshi wa isope, akebisabikye, kumune nka na kooni akatala mu mase a kooni katshiindjilwe pa meema a mu musulo ; 7 n’akamiamina, misuusa musambobidi2 pa mbidi pa yawa muntu e na kituungo kia kutoshiibwa ku kifwi, n’akamutoosha selele3 ; kunyima akapoosola kaaka kooni akatala mu mapya. 8 Na yawa muntu e na kituungo kia kutoshiibwa akasuula bilamba biaye na kukuula bwaa bwaye booso, kubapu aketuumpe mu meema ; n’akekala mutoshiibwe selele. Na kunyima kwa biabia, akatwela mu kibundji, akashaale paasha pa shibo yaye ya misokya muunda mwa mafuku musambobidi. 9 Abikakitshika’ni’shi, p’efuku dia musambobidi, akakuula bwaa bwaye booso, mutwe waye, na mieefu na bikyenyikyenyi biaye ; akakuula bwaa bwaye booso ; n’akasuula bilamba biaye, akatuumpe mbidi yaye mu meema, n’akekale selele. *(1) Sunga’shi : pa meema a musulo awalaala. — (2) Tala biabia biabadi bakite mu kipindji kia 8,11; mpaa na muno mu kishingatshilo kia 16, 27, na 51. — (3) Sunga kwamba’shi : akamwelele musaase’shi e selele. 10 Na p’efuku dia mwaanda, aate baana babidi ba mukooko bashii nakilema, na mukooko ukashi waana wa kipwa kimune, ushii kilema, na bipindji bisatu bia mwikumi bia bukula bwi soo bufuuntwe mu mwimu, bu mulambu wa kituumbula, na longe4 lumune lwa mwimu. 11 Na yawa tshiite-mwakwidi akukita mushiinga wa kutoosha akatuula uno muntu e na kituungo kia kutoshiibwa, mpaa na bino bintu, kumpala kwa A Yikalayika, ku kitwelelo kia shibo y’efumankeeno ; 12 na tshiite-mwakwidi aata [mwana] umune a ku baana ba mukooko, akamulubule bu kitapilo ku mwanda wa kupishiibwa, mpaa na longe lwa mwimu, n’akebipuka bu mulambu upukiibwe kumpala kwa A Yikalayika ; 13 kunyima akatshiindje mudibu wa mwana a mukooko pa [yaya] mbalo pabatshiindjila kitapilo ku mwanda wa [kulekyelwa kwa] bubi na kitapilo kia kushiikwa mu kaalo, mu mbalo yi selele ; mwanda kitapilo ku mwanda wa kupishiibwa kii bu kitapilo ku mwanda wa [kulekyelwa kwa] bubi, nyi nkia tshiite-mwakwidi : kiakia nyi nkintu kii selele. 14 Na tshiite-mwakwidi akaata mase a kitapilo ku mwanda wa kupishiibwa, tshiite-mwakwidi akeashiinga ku nsongo y’etwi dibalume dia yawa e na kituungo kia kutoshiibwa, na pa kiaala ki’eyaasa diaye dibalume, na p’ena dikata dia lwao lwaye lubalume. 15 Na tshiite-mwakwidi akaata mwimu mu longe, n’akeusukumuna muunda mw’eyaasa diaye dibakashi, [eyaasa] diaye’ye tshiite-mwakwidi ; 16 tshiite-mwakwidi akasabika munwe w’eyaasa diaye dibalume mu mwimu wi muunda mw’eyaasa diaye dibakashi, akamiamine [wawa] mwimu misuusa musambobidi na munwe waye, kumpala kwa A Yikalayika. 17 Na ku wawa mwimu aushaale muunda mw’eyaasa diaye, tshiite-mwakwidi akeushiinga ku nsongo y’etwi dibalume dia yawa muntu e na kituungo kia kutoshiibwa, na pa kiaala ki’eyaasa diaye dibalume, na p’ena dikata dia lwao lwaye lubalume, [paapa panundu] pa mase a kitapilo ku mwanda wa kupishiibwa ; 18 na mwimu wawa ubashaala muunda mw’eyaasa dia tshiite-mwakwidi, akeushiinga ku mutwe wa yawa muntu e na kituungo kia kutoshiibwa ; na tshiite-mwakwidi akamukitshiina mushiinga wa kubwikiila milwisho kumpala kwa A Yikalayika. 19 Na tshiite-mwakwidi akalambula kitapilo ku mwanda wa [kulekyelwa kwa] bubi, n’akakitshiina, yawa muntu e na kituungo kia kutoshiibwa ku butete bwaye, mushiinga wa kubwikiila milwisho ; na kunyima, akatshiindja mudibu wa kitapilo kia kushiinkwa mu kaalo. 20 Na tshiite-mwakwidi akalambula kumune [kiakia] kitapiloa kia kushiikwa mu kaalo na kituumbula pa kilambwilo ; na tshiite-mwakwidi akakita mushiinga wa kubwikiila kwa milwisho bwa yawa [muntu e na kituungo kia kutoshiibwa], n’aye akeekala selele. *(4) Longe : nyi nkipimino kia mulangi kia kupwandjikishiibwa na kia mbisatu kia litre umune. 21 Na su e bulanda, ku maboko kwaye namu tamulombeene kukumbasha biabia, aata mwana a mukooko mulume bu kitapilo ku mwanda wa kupishiibwa, bwa mulambu upukiibwe, bwadia kukita mushiinga wa kubwikiila milwisho, na kimune kia mwikmi kia bukula bwi soo bufuuntwe mwimu, bwa mulambu wa kituumbula, na longe lumune lwa mwimu, 22 na tukutshikutshi tubidi sunga baana ba nkudiimba babidi, muyiile kumona kwaye kwa ku maboko : kamune akakeekala kitapilo ku mwanda wa [kulekyelwa kwa] bubi, kangi namu bu kitapilo kia kushiikwa mu kaalo. 23 Na p’efuku dia mwaanda dia kutoshiibwa kwaye, akatwala twanka5 kwi tshiite-mwakwidi ku kitwelelo kia shibo y’efumankeeno, kumpala kwa A Yikalayika ; 24 na tshiite-mwakwidi aata mwana a mukooko a kitapilo ku mwanda wa kupishiibwa, lwawa longe lwa mwimu, tshiite-mwakwidi ebipuku bu mulambu upukiibwe kumpala kwa A Yikalayika : 25 akatshiindje’ni mudibu wa mwana a mukooko, a kitapilo ku mwanda wa kupishiibwa ; na tshiite-mwakwidi aata mase a kitapilo ku mwanda wa kupishiibwa, eashiingye ku nsongo y’etwi dibalume dia yawa e na kituungo kia kutoshiibwa, na pa kiaala ki’eyaasa diaye dibalume, na p’ena dikata dia lwao lwaye lubalume. 26 Na tshiite-mwakwidi akasukumuna mwimu muunda mw’eyaasa diaye dibakashi, [eyaasa] diaye’ye tshiite-mwakwidi , 27 na munwe w’eyaasa diaye dibalume, tshiite-mwakwidi akamiamina mwimu wi muunda mw’eyaasa diaye dibakashi, misuusa musambobidi, kumpala kwa A Yikalayika. 28 Na tshiite-mwakwidi [aata wawa] mwimu wi muunda mw’eyaasa diaye eushingye, ku nsongo y’etwi dibalume dia yawa e na kituungo kia kutoshiibwa, na pa kiaala ki’eyaasa diaye dibalume, na p’ena dikata dia lwao lwaye lubalume, pa yaya mbalo yabekeele bashiingye mase a kitapilo ku mwanda wa kupishiibwa ; 29 na wawa mwimu ooso aushaala wi mwiyaasa dia tshiite-mwakwidi, akeupongoola ku mutwe wa yawa muntu e na kituungo kia kutoshiibwa, bwa kumukitshiina mushiinga wa kumubwikidiila bubi kumpala kwa A Yikalayika. 30 Na, ku kiakia kiadi mufuumbule ku maboko kwaye, akalambula kaka kakutshikutshi kangi, sunga yawa mwana a nkudimba : 31 ku kiakia kiadi mufuumbule ku maboko kwaye, kooni kamune akakeekala bu kitapilo ku mwanda wa [kulekyelwa kwa] bubi, kangi keekale kitapilo kia kushiikwa mu kaalo, pamune na mulambu wa kituumbula ; na tshiite-mwakwidi akakita mushiinga wa kubwikiila milwisho bwa yawa e na kituungo kia kutoshiibwa, kumpala kwa A Yikalayika. — 32 Ngi bi mwiiya utale yawa sh’eloonda dia kifwi biabia, yawa shii na kamweno ka kukumbasha [kiakia kitekwe] bwa kutoshiibwa kwaye. *(5) Nyi nkwamba’shi : Twatwa tukutshikutshi tubidi sunga baana ba nkudimba. 33 Na A Yikalayika besaambile na Mose na Alone, aye nkwamba’shi : 34 P’anukekala batwele mwiumbo dia Kanaana, diadia dianenupa bu dienu, su nantumu eloonda6 dia kifwi muunda mwa shibo [imune] ya mwiumbo dienu, 35 yawa wiini shaa shibo akafiki ebiwukishe tshiite-mwakwidi, aye’shi : Nampwandjikisha’shi kintu kiankwete kumona mu shibo yande kii bu eloonda [dia kifwi] ; 36 na tshiite-mwakwidi akatuma eyi’shi batuushe bintu bioso bi mu shibo kumpala kwa’shi tshiite-mwakwidi atwele bwa kumona eloonda, bwa’shi kiakia kioso ki mu shibo takiikashwanga butete ; na kunyima kwa biabia, tshiite-mwakwidi akatwela bwa kumona shibo. 37 N’aye akatala eloonda : talanga, eloonda namu di mwiini mu midiimba ya shibo, bipoonko7 bii mbidi ya buleesesunga bimoongolokye, abimwekwa’ni’shi mbitwele muunda mu midiimba ; 38 paapa tshiite-mwakwidi akatuuka mu shibo, [ayimane] pa kitwelelo kia shibo, ashitshishe nshibo muunda mwa mafuku musambobidi. 39 Na p’efuku dia musambobidi, tshiite-mwakwidi akaalukiila, atale : talanga, eloonda dibaatama mu midiimba ya shibo ; 40 paapa tshiite-mwakwidi akatuma eyi’shi bapoongole mabwe aa e n’eloonda, na’shi beasuumbule paasha pa kibundji, mu mbalo yi butete. 41 N’akakoolesha muunda mwa shibo, kwiyifuunyisha, na lufuufi lwabadi bakoole, abakelusukumuna paasha pa kibundji, mu mbalo yi butete ; 42 kunyima abakaata angi mabwe, beaalushe pa mbalo apekalanga mabwe [a kwibedi], bakaate’ni ungi potopoto bashine shibo. 43 Na su eloonda dibaaluka na dibakwata shibo kunyima kwa’bo babaapu kupoongola mabwe, abo babaapu’ni kukoola shibo, n’abo babaapu kwiyishina, 44 tshiite-mwakwidi akatwela atale : talanga, su eloonda dibaatama mu shibo, — nyi nkifwi akiteme mu shibo : yaya shibo yi butete. 45 Paapa abakapoongola shibo, bakaashe mabwe aa’yo na mabaaya aa’yo, mpaa na potopoto ooso [mushine] a shibo, bakeende n’abio paasha pa kibundji, mu mbalo yi butete. 46 Na yawa ooso ekeele mutwele mu shibo mu aa mafuku ooso ayidi ishitwe, akeekala butete mpaa na ku kiolwa ; 47 na yawa ooso akeekala mulaale mu shibo akasuula bilamba biaye ; na yawa ooso akeekala mudiile kintu mu [yaya] shibo akasuula bilamba biaye. 48 Anka su tshiite-mwakwidi batwele, na batala, omonengye, eloonda tanditame mu shibo kunyima kwa’bo kwiyishina nya, tshiite-mwakwidi akeelela shibo musaase’shi yi selele, mwanda eloonda dibapaanda. *(6) Sunga kwamba’shi : kipupa kia kifwi. — (7) Sunga kwamba’shi : mitaanta. 49 Na bwa kutoosha shibo selele, [tshiite-mwakwidi] akaata tooni, na mutshi wa mufula, na kilamba kimoonga, na mutshi wa isope ; 50 akatshiindjila mudibu wa kooni kamune ku nundu kwa lweso lwa buma, pa meema a musulo8 ; 51 na akaata mutshi wa mufula, na mutshi wa isope, na kilamba kimoonga, na kooni akatala, ebisabikye mu mase a kaaka kangi kooni katshiindje mudibu, na mu [aa] meema a musulo ; n’akamiamina ku shibo misuusa musambobidi, 52 akatoosha shibo selele, na mase a kooni mpaa na meema a musulo, na kooni akatala, na mutshi wa mufula, na mutshi wa isope, na kilamba kimoonga ; 53 kunyima akapoosola kaaka kooni akatala paasha pa kibundji, mu mapya. Na akakitshiina shibo mushiinga wa kubwikiila milwisho9, n’ayo ayikeekala selele. *(8) Sunga’shi : pa meema a musulo awalaala. — (9)Ngi kwamba’shi : Kwiyisuula ku bubi. 54 Biabia ngi bi mwiiya ukume eloonda dia kifwi, na kiishisepwa, 55 na [mwiiya] ukume kifwi kia ku bilamba na kia ku mashibo, na makunu, 56 na mabubila, na mabashi atookolokye, 57 bwa kulongyesha mu kipindji kini mwi butete, na, mu kipindji kini takwi butete : Ngi bi mwiiya wa kifwi biabia. 15 Chapitre 15 *1 Na A Yikalayika besaambile na Mose na Alone, aye nkwamba’shi : 2 Esaambeyi na baana ba Isalele, nwibalungule’shi : Muntu ooso e na kapwepwe1 mu mbidi mwaye, — musololo waye aumwikasha butete. 3 Na kiini akikeekala butete bwaye, mu musololo waye nkino : sunga kwamba’shi mbidi yaye ayikisha ayikisha musololo wa’yo, sunga’shi mbidi yaye ayiimika musololo wa’yo, nyi mbutete bwaye bwabwa. 4 Lusala looso lulaadilwe na yawa mukwatwe na musololo alwikala butete ; na kintu kioso kiadi mushaleele akikeekala butete. 5 Muntu ooso a kukuma musololo lusala lwaye akasuula bilamba biaye, n’aketuumpa mu meema ; akeekala’ni butete mpaa na ku kiolwa. 6 Nayawa ooso akashaala pa kintu kishadiibwe na yawa shaa musololo, akasuula bilamba biaye, n’aketuumpa mu meema ; akeekala’ni butete mpaa na ku kiolwa. 7 Na yawa ooso akakuma mbidi ya shaa musololo, akasuula bilamba biaye, n’aketuumpa mu meema ; akeekala’ni butete mpaa na ku kiolwa. 8 Na su yawa shaa musololo apoonga [muntu] e selele mata2, uno muntu akasuula bilamba biaye, n’aketuumpa mu meema ; akeekala’ni butete mpaa na ku kiolwa. 9 Ngolofwanda ooso abadi bakaamine kwi shaa musololo, akeekala butete. 10 Na yawa ooso akakuma kintu kioso [kiadi mushaleele] kuushi kwaye, akeekala butete mpaa na ku kiolwa ; na yawa ooso akasemuna kimune kia ku biabia bintu akasuula bilamba biaye, n’aketuumpa mu meema ; akeekala’ni butete mpaa na ku kiolwa. 11 Na yawa ooso abadi bakume shaa musololo kadi shiii musuule maasa aaye mu meema, akasuula bilamba biaye, n’aketuumpa mu meema ; akeekala’ni butete mpaa na ku kiolwa 12 Na ngyeso ya buma yabadi bakume kwi yawa shaa musololo, ayikatanyiibwa ; na lweso3 looso lwa mutshi alukasuulwa mu meema. *(1) Sunga’shi : Muntu e na musololo autuuku mu mbidi mwaye, sunga wekala wa mase sunga wa kingi kintu bu meema na tufina. — (2) sunga’shi : amwaasa kikolofi. — (3) Sunga’shi : kintu kioso kia mutshi, bu kipulu n’ekopo. 13 Na yawa shaa musololo, pakekala mutoshiibwe ku musololo waye, akabadika mafuku musambobidi bwa kutoshiibwa kwaye ; kubapu akasuula bilamba biaye, n’akatuumpa mbidi yaye mu meema a mu musulo4 ; n’akeekala selele. 14 Na p’efuku dia mwaanda, akaata tukutshikutshi tubidi, sunga baana ba nkudiimba babidi, n’akafika kwi A Yikalayika, ku kitwelelo kia shibo y’efumankeeno, akeetupe tshiite-mwakwidi ; 15 na tshiite-mwakwidi aketulambula, kamune bu kitapilo ku mwanda wa [kulekyelwa kwa] bubi, na kamo bu kitapilo kia kushiikwa mu kaalo ; na tshiite-mwakwidi akamukitshiina mushiinga wa kubwikiila milwisho kumpala kwa A Yikalayika, ku mwanda wa musololo waye. *(4) Sunga’shi : mu meema a musulo awalaala 16 Na peekale meema a bu mulume aatuuku muntu, akatuumpa mbidi yaye yoso mu meema ; n’akeekala butete mpaa na ku kiolwa. 17 Na kilamba kioso sunga musokya ooso aukapoonwa na [aa] meema a bu mulume, aukasuulwa mu meema, n’aukeekala butete mpaa na ku kiolwa. 18 Na mwana mukashi mulaale na mulume baapwe kwiukeena n’aye ; … abaketuumpa mu meema, n’abakeekala butete mpaa na ku kiolwa. 19 Na mwana mukashi e na musololo, na wawa musololo waye mu mbidi yaye weekala wa mase, akeekala mu kwamuunwa5 kwaye [muunda mwa] mafuku musambobidi, na yawa ooso akamukuma akeekala butete mpaa na ku kiolwa. 20 Na kintu kioso kiakia kiadi mushaleele muunda mwa wamuunwa kwaye akikeekala butete ; 21 na yawa ooso akakuma lusala lwaye akasuula bilamba biaye, n’aketuumpa mu meema ; akeekala’ni butete mpaa na ku kiolwa. 22 Na yawa ooso akakuma kintu, sunga kini na kini, kiakia kiadi mushaleele, akasuula bilamba biaye, n’aketuumpa mu meema ; akeekala’ni butete mpaa na ku kiolwa. 23 Na su kwi kintu pa lusala, sunga kini na kini, kiakia kiadi mushaleele, ooso yawa ekikumu akeekala butete mpaa na ku kiolwa. 24 Na su mwana mulume alaana n’aye, na’shi butete bwaye bwi paadi, [yawa mulume] akeekala butete [muunda mwa] mafuku musambobidi ; na lusala looso lw’akaladila alukeekala butete. 25 Na peekale mwana mukashi e na musololo wa mase aunoko mafuku akile bungi kushii mafuku a kwamuunwa kwaye, sunga’shi e na musololo mafuku a kwamuunwa abaapu kukila, mafukuooso a musololo wa butete bwaye mmwikale buutete, nka bu mu mafuku a kwamuunwa kwaye. 26 Lusala looso lwakalaadila mafuku ooso a musololo waye alukeekala bu lusalalwa kwamuunwa kwaye ; na kintu kioso kiakia kiadi mushaleeele akikeekala butete, muyiile butete bwa kwamuunwa kwaye. 27 Na yawa ooso akakuma biabia bintu akeekala butete, n’akasuula bilamba biaye, n’aketuumpa mu meema ; akeekala’ni butete mpaa na ku kiolwa. *(5) Sunga’shi : mu butete bwaye. Tala kipindji 12, 2 28 Na su [yawa mwana mukashi] batoshiibwa ku musololo waye, akabadika mafuku musambobidi, na kunyima, akeekala selele ; 29 na p’efuku dia mwaanda, akaata tukutshikutshi tubidi sunga baana ba nkudiimba babidi, aketutwale kwi tshiite-mwakwidi, ku kitwelelo kia shibo y’efumankeeno. 30 Na tshiite-mwakwidi akalambula [kooni] kamune bu kitapilo ku mwanda wa [kulekyelwa kwa] bubi, na kangi bu kitapilo kia kushiikwa mu kaalo ; na tshiitemwakwidi akakita mushiinga wa kubwikiila milwisho bwa yawa mukashi kumpala kwa A Yikalayika, pamwanda wa musololo wa butete bwaye. 31 Biabia anukalambukisha baana ba Isalele ku butetebwabobwa mshindo yoso, na tabakafwila mu butete bwabo pa mwanda wa kwikasha yaya Nshibo yande ya kushaala yii selele yi munkatshi mwabo nya. 32 Bino ngi bi mwiiya wa yawa e na musololo sunga bwa yawa atuukwa na meema a bu mulume aamwikasha butete, 33 na bwa mwana mukashi akyengye pa mwanda wa mafuku aaye a mieeshi, mu mafuku a kamuunwa kwaye, na bwa mwana mulume ooso e na musololo, eekala mulume sunga mmukashi, na bwa yaa alaala na mukashi e butete. 16 Chapitre 16 1 Na A Yikalayika besaambile na Mose, kunyima kwa lufu lwa baana ba Alone balume babidi, pababafwile, pa mwanda ubabeseesele peepina A Yikalayika ; 2 na A Yikalayika balungwile Mose’shi : Lungula mukwenu Alone’shi, takumanga kutwela ku kipindji kioso mu balo yi selele, [mwamwa] muunda mwa kilamba kia lushiko, kumpala kwa kibwikiilo kii pa musheete [wa kilombeeno], kupela’shi tala afwa ; mwanda nammwekwa mwikuumbi paapa pa kibwikiilo. 3 Alone akatwela mu mbalo yi selele mu kino kipaso : atwele na mwana a ngombe mulume a kitapilo ku mwanda wa [kulekyelwa kwa] bubi na mukooko ulume wa kitapilo kia kushiikwa mu kaalo ; 4 afwala musapi wa lin wi selele, na tuputula twa muushi twa lin twikale pa mbidi paaye, na mukaba wa lin mu kifuka kiaye, na ku mutwe waye ebwikile kituuto kia lin : bino nyi mbifwalo bii selele ; n’akatuumpa mbidi yaye mu meema ; kunyima ebifwale. 5 Na [Alone] akaata mbushi ilume ibidi kwi kakongye ka baana ba Isalele bwa kitapilo ku mwanda wa [kulekyelwa kwa] bubi, na mukooko ulume bwa kitapilo kia kushiikwa mu kaalo. 6 Na Alone akalubula ngombe a kitapilo ku mwanda wa [kulekyelwa kwa] bubi, yawa [ngombe] aaye’ye nabene, na akakitshi mushiinga wa kubwikiila milwisho yaye’ye nabene na bwa shibo yaye. 7 Na akaata yaya mbushi ibidi ilume, akeyituule kumpala kwa A Yikalayika, ku kitwelelo kia shibo y’efumankeeno. 8 Na Alone akeelela yaya mbushi ibidi ilume bubale, kyeelo kimune bwa A Yikalayika na kingi kyeelo bwa asasele1. 9 Na Alone akalubula yawa mbushi mulume bapoonwa na bubale bu a A Yikalayika, akakite n’aye kitapilo ku mwanda wa [kulekyelwa kwa] bubi. 10 Na yawa mbushi mulume bapoonwa na bubale bu asasele, akatuulwa na muwa kumpala kwa A Yikalayika, bwa’shi bamukitshiine mushiinga wa kubwikiila milwisho, bwabadia kumutuma mu kabaaka’shi eekale asasele. *(1) Asasele, nyi nkwamba’shi : mbushi mulume ayididiila. 11 Na Alone akalubula yawa ngombe mulume a kitapilo ku mwanda wa [kulekyelwa kwa] bubi, yawa [ngombe] aaye’ye nabene, na akakita mushiinga wa kubwikiila milwisho yaye’ye nabene na bwa shibo yaye ; na akatshiindjia ngombe a kitapilo ku mwanda wa [kulekyelwa kwa] bubi mudibu, yawa aaye’ye nabene ; 12 kunyima aate mbabula2 muwule makala a kaalo, paapa pa meesa a kilambwilo e kumpala kwa A Yikalayika, na maasa aaye awuule museengo wa kabaanda k’eshiko kaungye mu kayingo, akatwele nabio muunda mwa kilamba kia lushiko ; 13 na akeela kabaanda pa kaalo, kumpala kwa A Yikalayika, bwa’shi ekuumbi dia mwiishi wa kabaanda dibwikiile kibwikiilo kiakia kii pa bu-kamoni, bwa’shi tala afwa. 14 Na akaata mase a yawa ngombe mulume, akeamiamine3 kumpala na munwe kumpala kwa kibwikiilo, ku lupese lutuunduka nguba ; akamiamina’ni mase na munwe waye, misuusa musambobidi, kumpala kwa kibwikiilo. *(2) Sunga’shi : kipukilo kibabanangwilanga n’akio bukula bwa mapeembwe. — (3) Akitshi biabia bii mu kipindji 4. 6 ; bimune na mu kishingatshilo 15 na 19. 15 Kunyima, akatshindja mbushi mulume a kitapilo ku mwanda wa [kulekyelwa kwa] bubi, yawa a mwiilo [wa beena Isalele], na akatwala mase aaye muunda mwa kilamba kia lushiko, na akakita na mase aaye biabia biakitshiine na mase a ngombe mulume : akamiamina aa [mase] ku kibwikiilo mpaa na kumpala kwa kibwikiilo. 16 Na [Alone] akakita mushiinga wa kubwikiila milwisho bwa mbalo yi selele, [eyitooshe] ku butete bwa baana ba Isalele na ku mwanda wa kutupilwa kwabo kwa mwiiya, muyiile milwisho yabo yoso ; na akakita’ni biabia bimune bwa shibo y’efumankeeno, yaya shibo yi n’abo munkatshi mwa butete bwabo [bukile bungi]. 17 Takwikalanga muntu su ngumune mu shibo y’efumankeeno ku kiakia kipindji kiakatwela bwa kukita mushiinga wa kubwikiila milwisho mu mbalo yi selele, mpaa napakemutuukila ; n’akakita mushiinga wa kubwikiila milwisho bwaye’ye nabene na bwa shibo yaye, na bwa mwiilo ooso wa Isalele. 18 N’akatuuka mwamwa atadiile ku kilambwilo kii kumpala kwa A Yikalayika, n’akekikitshiina mushiinga wa kubwikiila milwisho ; n’akaata mase ngombe mulume na aa a mbushi mulume, eashiingye ku nsengwa ya kilambwilo, mbwipi mooso ; 19 kunyima akekimiamina mase na munwe waye, misuusa musambobidi, nakekitoosha selele, na kwikilamuuna ku butete bwa baana ba Isalele. 20 Na kipindji kiakapudisha kukita mushiinga wa kubwikiila milwisho bwa mbalo yi selele, bwa shibo y’efumankeeno, na bwa kilambwilo, akalubula [yawa] mbushi mulume atala 21 Na Alone akatenteka maasa aaye abidi ku mutwe wa mbushi [yawa] atala, akasokwele paadi bukitekite booso bwa baana ba Isalele na bilubilo biabo muyiile milwisho yabo ; akeyitenteka pa mutwe wa mbushi, n’akamutuma mu kabaaka na muntu akeekala’nkapeepi [bwa kukita biabia] ; 22 na [yawa] mbushi mulume akasemuna pa mbidi paaye bilubilo biabo bioso mu nsenga ishii ishaale bantu ; na yawa muntu akapoosola mbushi ende mu kabaaka. 23 Na Alone akaalukiila ku shibo y’efumankeeno, akafuule bilamba bia lin bi’ekalanga mufwale pa kutwela mu mbalo yi selele, n’akebituulu mwamwa ; 24 n’akatuumpa mbidi yaye mu meema mu [ingi] mbalo yi selele, n’akafwale bilamba biaye ; kunyima akatuuka, n’akalambula kitapilo kiaye kia kushiikwa mu kaalo mpaa na kitapilo kia mwiilo [kia kushiikwa u kaalo], n’akakita mushiinga wa kubwikiila milwisho bwaye’ye nabene na bwa mwiilo. 25 Na mwimu wa kitapilo ku mwanda wa [kulekyelwa kwa] bubi akeushiika kaalo ku kilambwilo. 26 Yawa muntu muntu namu twadile mbushi’shi eekale asasele akasuula bilamba biaye, n’akatuumpa mbidi yaye mu meema ; na kunyima kwa biabia aalukiila mu kibundji4. 27 Na ngombe a kitapilo ku mwanda wa [kulekyelwa kwa] bubi, na [yawa] mbushi a kitapilo ku mwanda wa [kulekyelwa kwa] bubi, yaya nyema yabaatshile mase batwela nao mu mbalo yi selele bwa kukita mushiinga wa kubwikiila milwisho, abakeyitwala paasha pa kibundji, na musokya wa’yo, na mwiita wa’yo, mpaa na tufi twa’yo, abakebishiika mu kaalo. 28 Na yawa namu akebishiika mu kaalo akasuula bilamba biaye, n’akatuumpa mbidi yaye mu meema ; kunyima kwa biabia akaalukiila mu kibundji. *(4) Sunga’shi : Mu musuumba mwi beena Isalele. 29 Na uno aukeekala bu mwiiya wenu aushadidiila losoo : pa mweshi wa musambobidi, [efuku] di’ekumi dia mweshi, nuongamishe bikudi bienu, na tanufubanga mufubo su ngumune, kwi mwina Isalele namwini sunga nkwi mwenyi e mu kuteemba munkatshi mwenu ; 30 mwanda mu diadia efuku, abakenukitshiina mushiinga wa kubwikiila milwisho, bwa’shi benutooshe : biabia anukeekala batoshiibwe ku milwisho yenu yoso kumpala kwa A Yikalayika. 31 Adikeekala bwenu’nwe [efuku dia] sabato a kwikisha, n’anukanyongosha bikudi bienu ; [nyi] mwiiya aushadidiila losoo. 32 Na tshiite-mwakwidi akeekala mushiingwe mwimu na mwikale musaangulwe bwa kufuba mufubo wa bu tshiite-mwakwidi pa mbalo ya nshaye, akakita mushiinga wa kubwikiila milwisho ; n’akafwala bilamba bia lin, biabia bilamba bi selele ; 33 akakita’ni mushiinga wa kubwikiila milwisho bwa mbalo yi selele, akakite’ni mushiinga wa kubwikiila milwisho bwa shibo y’efumankeeno na bwa kilambwilo, akakite’ni mushiinga wa kubwikiila milwisho bwa ba tshite-mwakwidi mpaa na bwa mwiilo ooso wa kakongye. 34 Na uno aukeekala mwiiya aushadidiila losoo bwenu’new, bwakukitshiina baana ba Isalele mushiinga wa kubwikiila milwisho [bwa kwibatoosha] ku milwisho yabo yoso, musuusa umune ku kipwa. N’abo babakitshiine bu bibaadi A Yikalayika mukamikile Mose. 17 Chapitre 17 *1 Na A Yikalayika besaambile na Mose, aye nkwamba’shi : 2 Esaambe na Alone na baana baaye, wesaambe mpaa na baana Isalele, webalungule’shi : A Yikalayika bakamika dino eyi, baakula’shi : 3 Yawa ooso a mu shibo ya Isalele akutshiindjia mudiu wa ngombe sunga wa mukooko su ngwa mbushi, mu kibundji, sunga yawa ooso mwiutshiindjile paasha pa kibundji, 4 anka su tamumutwale ku kitwelelo kia shibo y’efumankeeno bwa kumulubula bu mulambu kwi A Yikalayika kumpala kwa shibo ya misokya ya A Yikalayika, mase aakakyendwa yawa muntu : banosha mase ; yawa muntu akakashiibwa munkatshi mwa mwiilo wabo ; 5 bwa’shi baana ba Isalele batwale bitapilo biabo , biabia biabakwete kutapilanga mu mapia, bebitwadile A Yikalayika, ku kitwelelo kia shibo y’efumankeeno, kwi tshiite-mwakwidi, bebitapile bu bitapilo bia kufukama kwi A Yikalayika. 6 Na tshiite-mwakwidi akamiamina mase ku kilambwilo kia A Yikalayika, ku kitwelelo kia shibo y’efumankeeno, n’akekushiikila mwimu kaalo utuushe eshiko dii mapembwe e buwa kwi A Yikalayika ; 7 dingi tabaanalambule dimo bitapilo biabo kwi bikidi bibi, biabia biabakwete kutambuka nabio lusandji, uno aukeekala kwabadi’bo bu mwiiya aushadidiila losoo, mu bipungo biabo. 8 Okebalungule’ni bino : Yawa ooso a mu shibo ya Isalele, sunga bantu benyi be mu kuteemba munkatshi mwa’bo, 9 [yawa ooso] akalambula kitapilo kia kushiikwa mu kaalo sunga kingi kitapilo na shii mwikitwale ku kitwelelo kia shibo y’efumankeeno bwa kwikitapila A Yikalayika, yawa muntu akakakashiibwa munkatshi mwa miilo yaye. 10 Na yawa ooso a mu shibo ya Isalele sunga bantu benyi be mu kuteemba munkatshi mwa’bo, akadia mase mu kipaso kioso kiaekala, mpala yande ayikeshikwena na yawa akadia mase, na nankamukaasha munkatshi mwa mwiilo waye ; 11 mwanda muwa1 wa kipangwa kioso2 wi mu mase ; n’ami nemwinupe eeni aa mase pa kilambwilo, bwa kukitshiina bikudi bienu mushiinga wa kubwikiila milwisho ; mwanda mase ngi aakitshiina kikudi mushiinga wa kubwikiila milwisho. 12 Ngi bwakini nemulungule baana ba Isalele’shi : Muntu su ngumune a munkatshi mwenu tadianga mase, na mwenyi mufikye mu kuteemba munkatshi mwenu, tadianga mase. 13 Na yawa ooso a ku baana ba Isalele, na a ku benyi bafikye mu kuteemba munkatshi mwa’bo, akakwaata nyema sunga kooni akadiibwa mu kuta, akasuumbule mase [paashi] na eabwikiile lufuufi [lwa nsenga] ; 14 mwanda, bitale muwa wa kipangwa kioso, mase aakio ngi muwa waakio mwakidi ; n’ami nemulungule baana ba Isalele’shi : Tanukadianga mase a kipangwa sunga nkimune kii na mbidi ; mwanda muwa wa kintu kioso nyi mase aakio ; yawa ooso akeadia akakashiibwa. 15 Na muntu ooso, mwina Isalele mutandwe muno sunga mwenyi, akadia mwiita wa nyema mwifwile sunga mwipayibwe [na ungi nyema a kisuku], akasuula bilamba biaye n’aketuumpa mu meema, akeekale’ni butete mpaa na ku kiolwa : paapa akeekala selele. 16 Anka su akutwa kusuula [bilamba biaye] sunga kutuumpa mbidi yaye [mu meema], akasemuna bushito bwa bubi bwaye. *(1) Sunga’shi : Anima. — (2) Sunga’shi : Muwa wa mbidi. 18 Chapitre 18 *1 Na A Yikalayika besaambile na Mose, aye nkwamba’shi : 2 Esaambe na baana ba Isalele, webalungule’shi : Ami, ne A Yikalayika, Efile Mukulu’enu. 3 Tanukakitanga biabia abikitwa mwiumbo dia Eshipitu mubaanudi bashaale, na tanukakitanga biabia abikitwa mwiumbo dia Kanaana mwamwa mwankenutwesha, na tanukatambukanga mupuunda bipikwa bia’bo. 4 Nukakite’nka muyiile mayi1 ande, na nukalame miiya yande bwa kwimutambukila. Ami, ne A Yikalayika, Efile Mukulu’enu. 5 Nukalame miiya yande na bitshibilo2 biande, kukidila kwayidi, muntu eyifubila akeekala na muwa. Ami, ne A Yikalayika. *(1) sunga’shi : Bitshibilo. Twi kwata’ni uno mwaku biabia mu mbalo yoso. — (2) Sunga’shi : mayi. 6 Muntu su ngumune t’efikeenanga peepi na mukwabo a muunda mukashi, bwa kumona muswa waye. Ami, ne A Yikalayika. 7 Tokamonanga muswa wa nshobe, sunga muswa wa nyinobe : nyi nyinobe ; tokamonanga muswa waye. 8 Tokamonanga muswa wa mukashi a nshobe : nyi muswa wa nshobe. 9 Muswa wa mukwenu mukashi, mwana a nshobe sunga a muunda mwa nyinobe, mutandiibwe mu shibo [mwenu] sunga paasha, — muswa waye, tokeumonanga nya. 10 Muswa wa mwana mukashi a mwanobe mulume sunga wa mwana mukashi a mwanobe mukashi3, — muswa waye, tokeumonanga nya ; mwanda nyi muswa oobe. 11 Muswa wa mwana mukashi a mukashi a nshobe, mutndjishwe na nshobe, — nyi nkashanobe : tokamonanga muswa waye. 12 Tokamonanga muswa wa nkashan’e na nshobe ; mwanda aye nyi mbidi ya nshobe yinabene. 13 Tokamonanga muswa wa mukwabo na nyinobe mukashi4 ; aye nyi mbidi ya nyinobe yinabene. 14 Tokamonanga muswa wa mukwabo na nshobe mulume ; twefikeenanga peepi na mukashi aaye : nyi nkashan’e na nshobe5. 15 Tokamonanga muswa wa mukashi a mwanobe mulume : nyi mukashi a mwanobe mulume ; tokamonanga muswa waye. 16 Tokamonanga muswa wa mukashi a mukwenu a muunda ; nyi muswa wa mukwenu. 17 Tokamonanga muswa wa mwana mukashi ooso yawa, akupu omono na wa mwanaye mukashi [aadi mutande] ; twatanga mwikulu aaye mukashi mwana a mwanaye mulume, sunga mwikulu aaye mukashi, mwana a mwanaye mukashi, bwa kumona muswa waye ; abo boso nyi mbidi yaye yinabene : diadia nyi etoombo. 18 Twatanga mukashi kwa mukwabo mukashi bwa kumumwesha mpombo pa kumona muswa waye mbwipi mwaye, paapa pa kii na muwa. 19 Na tofikanga peepi na mwana mukashi muunda mwa mafuku aaye a kwamunuka ku butete bwaye, bwa kumona muswa waye. 20 Na totwelanga eshinda dia busuunga na mukashi a mwinobe, bwa’shi weyikashe butete n’aye. *(3) Sunga’shi : Mwikulu oobe mukashi, mwana a mwanobe mulume sunga nga mwanobe mukashi. — (4) Sunga’shi : Taata a nyinobe sunga mwin’a nyinobe mukashi. — (5) Sunga’shi : nshobe mukashi. 21 Na totuushanga baana boobe bwa kwiakisha [ku kaalo] kwi Moloke6, na tomweshanga eshina di’Efile Mukulu oobe. Ami, ne A Yikalayika. 22 Tolalaanga na mwana mulume, kipaso kiabalaala na mwana mukashi : nyi nkintu kii ntoongye. 23 Tolalaanga na nyema bwa’shi weyikashe butete n’aye ; na mwana mukashi namu tayimananga kumpala kwa nyema, bwa kukita n’aye lusandji ; nyi nkafuutakanyi. 24 Tanwiyikashanga butete ku kintu su nkimune kia ku bino bintu, mwanda nyi nku bino bintu kubaadi bano beena maumbo bankwete kubinga kumpala kwenu beyikashe namu butete ; 25 n’eumbo dibeyikasha dinabene butete ; nanyooko bwabwa bubi padidi adio dinabene ; n’eumbo adilasa beeni bashaale mwanka. 26 Anka’nwe, nukalame miiya yande na bitshibilo biande, na tanukakitanga kintu su nkimune kia ku bino bintu bii ntoongye, sunga mwina Isalele mutandwe muno, sunga wenyi mufikye mu kuteemba munkatshi mwenu ; 27 mwanda bantu ba mwiumbo, babaadi mwanka kumpala kwenu, babakitshiine bino bintu bioso bii ntoongye, n’eumbo dibekeeshwe butete pa mwanda wa’bio ; 28 bisha kwinulasa namu eumbo, panukediikasha butete, bu bibadilashiise mwiilo ubaadi mwanka kumpala kwenu. 29 Mwanda yawa ooso akakita kintu su nkimune kia ku bino bintu, … bantu abakebikitshi, abakakashiibwa munkatshi mwa mwiilo wa’bo. 30 N’anwe nukalame kiakia kinankamika bwa kulama, mu kipaso kia’shi tanukitanga bipikwa bii ntoongye bibakitshikilwe kumpala kwenu ; biabia tanukeyikashanga butete pa kwibikita. Ami, ne A Yikalayika, Efile Mukulu’enu. *(6) Moloke ; nyi efile a beena Amona, abaabadi abalambula baana baking, abeelwa mu kaalo abatala. 19 Chapitre 19 *1 Na A Yikalayika besaambile na Mose, aye nkwamba’shi : 2 Esaambe na kakongye ka baana ba Isalele, webalungule’shi : Nwikale belamuune selele, mwanda ami A Yikalayika, Efile Mukulu’enu, ne mwilamuune selele. 3 Muntu ooso atshiine nyinaye na nshaye , nulame’ni mafuku ande a sabata. Ami, ne A Yikalayika, Efile Mukulu’enu. 4 Tanutadiilanga lupese lwi mankishi, na tanwikitshiinanga b’efile ba bilonda, Ami, ne A Yikalayika, Efile Mukulu’enu. 5 Su nubatapila A Yikalayika kitapilo kia kufukama, nwikitape bwa kutambulwa. 6 Akikadiibwa [mwiita wa’kio] anka diadia efuku dianudi bekilambule, na butookye ; kiakia namu akikashaala efuku dia kasatu, kakashiikwa mu kaalo. 7 Anka su beudia mu kingi kipaso mwifuku dia kasatu, akikeekala kintu kii butete ; [kiakia kitapilo] takikeekala kitambulwe nya. 8 Na yawa akeekidia akasemuna bushito bwa bubi bwaye, mwanda balwiisha kiakia kilambulwe A Yikalayika, na yawa muntu akakashiibwa [munkatshi] mwa bisaamba biaye. 9 Na panukaumbula biumbulwanga bia mu nsenga yenu, topudishanga kuumbula mapaka ananka a efuba diobe na topumbuulanga fwayi ya biumbulwanga. 10 Na Na totoondolanga tukuba twa mwifuba diobe dia finyo, sunga kutoondola ntete ipone [paashi] ya mwifuba diobe dia finyo ; okebilekyele balanda na bantu benyi. Ami, ne A Yikalayika, Efile Mukulu’enu. 11 Tanwibanga, tanwilubisheenanga [muntu na mungi] ku madimi, na tanudimbanga muntu madimi. 12 Tanutshipanga katshipo ka madimi mwishina diande ; na tonyangishanga eshina di’Efile Mukulu oobe. Ami, ne A Yikalayika. 13 Tomweshanga mwinobe malwa, na tomulwishiishanga1 kiaye nya. Efuto dia mwina mufubo oobe tadilalaanga bufuku ku shibo yobe mpaa na na ku namashika. *(1) Sunga’shi : Tomwatanga kintu kiaye bwa kumupoombesha. 14 Tolumbanga muntu shaa kitwi mulwa, na totuudilanga mpofu bikokoshi ku meeso kwaye  anka otshiine Efile Mukulu oobe. Ami, ne A Yikalayika. 15 Tanutshibanga kiimu mu kipaso kishii kilulame : totalanga mulanda mu bulanda bwaye, na tonemeekanga bwa muntu mpeta ; [anka] otshibile mwinobe kiimu na kululama. 16 Toumbakananga na twiipu munkatshi mwa mwiilo oobe. Toshikwanga muwa wa mwinobe. Ami, ne A Yikalayika, Efile Mukulu’enu. 17 Toshikwanga mukwenu mwishimba diobe. Tokutwanga bia kusaashila2 mukwenu, na tosemunanga bubi pa mwanda waye. 18 Tweobwelanga nya, na tolamanga mushikwa kwi baana ba mwiilo oobe ; anka ofule mwinobe kifulo bu’be nabene. Ami, ne A Yikalayika. *(2) Sunga’shi : kulaanga mukwenu. 19 Nulame miiya yande. Tofumankashanga nyema ya bipaso bibidi bilekeene ku matenta, munkatshi mwa bimunwanga biobe. Tokunanga mwifuba diobe bipaso bibidi bilekeene bia ntent ya mbio ; na tofwalanga pa mbidi poobe kilamba kilukiibwe na bipaso bibidi bilekeene bia mpeko. 20 Na su muntu balaala na batambuka na mwana mukashi, mwikale mufubi abadi bapwe kubangila kwi mulume, abashabandjile kukuula sunga nkupoosola [mu bupika], abakanyokiibwa [bubidi bwabo] ; tabakayipayibwa nya, mwanda yawa yawa mwana mukashi tambamupoosole nya. 21 Mulume namu akatwala mukooko ulume kwi A Yikalayika bu kitapilo kiaye ku mwanda wa kupishiibwa, ku kitwelelo kia shibo ya misokya yefumankeenoa. 22 Na tshiite-mwakwidi akamukitshiina mushiinga wa kubwikiila milwisho kumpala kwa A Yikalayika, na wawa mukooko ulume wa kitapilo kia kupiishiibwa, ku mwandabubi bwaye bubaakitshi ; na bubi abukamulekyelwa. 23 Na panukeekala batwele mwiumbo, na panukeekala bakune bipaso bioso bia mitshi ayidiibwa, anukalama bikuba bu bishii bisadiibwe ; abikeekala kwanudi bu bishii bisadiibwe muunda mwa bipwa bisatu : tabakebidianga nya. 24 Kipwa kia kananka namu, bikuba biayo bioso abikeekala kintu ki selele bwa ntumbo ya A Yikalayika. 25 Na kipwa kia katano, anukadia bikuba byayo, bwa’shi yaya mitshi yinufimiishe jupa kwayo. Ami, ne A Yikalayika, Efile Mukulu’enu. 26 Tanukadianga kintu kioso kiakia na mase. — Tanukabukanga mbuko, sunga kutemuka mianda mu lumonyi. 27 Tanukatendanga mapaka a nyeene yenu, na tanukateendanga mieefu yenu. 28 Na tanuketapanga nsalo mu mbidi yenu pa mwanda wa muntu mufwe, na tanwikyelanga ndjioloko [ku meeso]. Ami, ne A Yikalayika, Efile Mukulu’enu. — 29 Toyishiishanga mwanobe mukashi nkumo yibi, bwa kumutambushiisha lusandji, bisha kutambuka eumbo lusandji na bishakuwula mwiumbo mianda yi buufu3. — 30 Nukalame mafuku ande a sabato, na nukaneemekye mbalo yande yi selele. Ami, ne A Yikalayika. — 31 Tanutadiilanga kwi baaba abashuula mikishi, sunga kwi bantu abesaamba mianda yi buwa ; tanusuukilanga kwabadi bwa kwiyikasha butete. Ami, ne A Yikalayika Efile Mukulu’enu. *(3) Sunga’shi : mianda ya bibeshi. 32 Webwee kumpala kwa [muntu shaa] nyene itooka4 na oneemekye muntu mununu. Otshiine Efile Mukulu’obe. Ami, ne A Yikalayika. 33 Su muntu mwenyi mufikye koodi mu kuteemba mwiumbo dienu, tanumukyengyeshanga5. 34 Mwenyi mufikye munkatshi mwenu mu kuteemba eekale’nka bu mwina Isalele mutandjiibwe muno, na omufule kifulo’nka bu’be nabene, mwanda anwe namu nubaadi benyi mwiumbo dia Eshipitu. Ami, ne A Yikalayika Efile Mukulu’enu. 35 Tanukutwanga kwikala na kululama mu kutshiba kwa kiimu, sunga mu kupima kwa bula [bwa bintu], sunga mu kupima kwa bushito, sunga kupima kwa bungi [bwa bintu]. 36 Nukeekale na bipimo bilombane, bia bushito bilombane, mbaafu6 mukumbane, na hin7 mukumbane. Ami, ne A Yikalayika, Efile Mukulu’enu benutuushiisha mwiumbo dia Eshipilu. *(4) Sunga’shi : Kumpala kwa muntu mununu. — (5) Sunga’shi : tanumumweshanga malwa. — (6) Mbaafu, abetanyina’shi, épha, atwela litres makumi asatu. Mu bukula bii pangi bilo bibidi na kipindji. — (7) Hin : nyi nkipimino, kibaadi akitwele peepi na litres inanka ya mwimu… 37 Nukalame miiya yande yoso na bitshibilo biande bioso, na nukebitumikile. Ami, ne A Yikalayika. 20 Chapitre 20 1 A Yikalayika besaambile na Mose, aye nkwamba’shi : 2 Olungule dimo baana ba Isalele’shi : yawa ooso a munkatshi mwa baana ba Isalele, sunga a munkatshi mwa benyi bafikye mu kuteemba mu Isalele, yawa akatuusha baana baaye kwi Moloke, akaipayibwa mwiumbo ; mwiilo wa mwiumbo aukamwipa na mabwe. 3 Ami namu, meeso ande aakeekala mushikwa na yawa muntu, na nankamukaasha munkatshi mwa mwiilo waye, pa mwanda batuusha baana baaye kwi Moloke, bwa kwikasha shibo yande yi selele butete na bwa kumwesha eshina diande bu dii butete adio dii selele. 4 Anka su mwiilo wabwikiila meeso, mu kipaso kioso kiakia, kwi yawa muntu, patuusha baana baaye kwi Moloke, bwa kupela kumwipayisha, 5 ami, meeso ande aakeekala mushikwa na yawa muntu mpaa na kifuko kiaye, na nankamukaasha munkatshi mwa mwiilo waye, aye na baana baaye bosoabatambuka n’aye lusandji, abatambuka lusandji na Moloke. — 6 Na muntu ooso atadiila kwi baaba abeepusha mikishi na [yawa atadiila] kwi bantu abesaamba mianda ifwame, baaba abatambuka n’abo lusandji, nakatuula mpala yande mushikwa na yawa muntu, dingi nankamukaasha munkatshi mwa mwiilo waye. 7 N’anwe nwilamuune selele, na nwikale selele, mwanda ami, ne A Yikalayika, Efile Mukulu’enu. 8 Nukalame miiya yande, na nwiyifubile. Ami, na A Yikalayika enulamuuna selele. 9 Muntu ooso akweela nshaye na nyinaye mulwa akaipayibwa’nka mwiyendo ; eele nshaye na nyinaye mulwa, mase aaye aakekala pa mbidi paaye. 10 Su muntu atambuka lusandji na mukashi a mungi muntu, — yawa atambuka lusandji na mukashi a mwinaye… : mulume na mukashi beena lusandji abakayipayibwa mwiyendo. 11 Na muntu ekefikeena peepi na mukashi a nshaye, amono muswa wa nshaye, abakayipayibwa mwiyendo, bubidi bwabo : mase aabo e pa mbidi paabo. 12 Na su muntu balaala na mukashi a mwanaye mulume, abakayipayibwa mwiyendo, bubidi bwabo ; babakitshi kafuutakanyi : mase aabo e pa mbidi paabo. 13 Na su muntu balaala na mwana mulume n’aye, kipaso kiabalaala na mwana mukashi, babakitshi bubidi bwabo kintu kii ntoongye ; abakayipayibwa mwiyendo, bubidi bwabo ; mase aabo e pa mbidi paabo. 14 Na su muntu baata mukashi mpaa na mwana a mukashi, nyi mwanda wi buufu1 ; abebashiiki mu kaalo, aye na baaba bakashhi, na munkatshi mwenu tamukeeka kibeshi nya. 15 Na su muntu balaala na nyema, akayipayibwa mwiyendo ; anwe nwipee yawa nyema. 16 Na su mwana mukashi namu befikeena peepi na nyema, nyema kini ooso yawa, bwa kutambuka naye lusandji, oyipee mwana mukashi mpaanawiini nyema ; abakayipayibwa mwiyendo : mase aabo e pa mbidi paabo. 17 Na su muntu baata nkashanaye, mwana a nshaye mukashi sunga mwana a nyinaye mukashin bamono muswa waye, aye namu wiini mukashi baono muswa wa mulume, nyi mbuufu : abakaashiibwe ku meeso kwa baana ba mwiilo wabo ; bamonomuswa wa nkashanaye, akasemuna bubi bwaye. 18 Na su muntu balaala na mwana mukashi e na kilema, na amona muswa waye, bamono musololo waye, n’aye wiini mukashi amono musololo wa mase aaya : bubidi bwabo abakakaashiibwa munkatshi mwa munkatshi mwa mwiilo wa’bo. 19 Tokamonanga muswa wa taata a nyinobe, sunga taata a nshobe ; mwanda yawa akitshi biabia atuulu mbidi yaye patooka : abakasemuna bubi bwabo. 20 Na su muntu alaala na mwina a nshaye mukashi2, amono muswa wa mwina a nshaye mukashi ; abakasemuna bubi bwabo : abakafwa kushii [kutana] baana. 21 Na su muntu aata mukashi a mukwabo a muunda, nyi mbutete ; amono muswawa mukwabo : tabakatanda baana, nya. *(1) Sunga’shi : bwabwa mbetesha, kibeshi. — (2) Sunga’shi : Nshaye mukashi, abiitanyina bangi. 22 Na nukalame miiya yande yoso na bitshibilo biande bioso, na nukebitumikile ; bwa’shi diadia eumbo dianenutwesha bwa kwimushaala nkemushaala tadikenulasanga nya. 23 Na tanukatambukanga muyiile miiya ya mwiilo wiini wambingi kumpala kwenu nya ; mwanda mbakite yaya mianda yoso, ami namu nemwibapushe ntoongye ; 24 nemwinulungule’shi : Naanwe abakaata nsenga yaabo, na nenupa yanka bu yenu, [nyi] eumbo adinoko mabeela na buuki. Ami, ne A Yikalayika, Efile Mukulu’enu, benulamuuna munkatshi mwa miilo. 25 Na anukashinguula pankatshi pa nyema e selele na e butete, na pankatshi kooni ke selele na ke butete, na tanukeyikasha ntoongye kwi nyema, sunga nkwi tooni, kwi kintu kioso akiikaka paashi mu nsenga, kiandi mwabuule’shi kii butete. 26 Anwe namu anukeekala kwandji selele, mwanda ne mwilamuune selele, ami, A Yikalayika ; na nemwinulamuune munkatshi mwa miilo, bianudia kwikala bande. 27 Na su mwana mulume sunga mwana mukashi abesaamba na mikishi, sunga be bu abaakula mianda yi buwa ifwame, abakayipayibwa mwiyendo ; abakebaasa mabwe : mase aabo aakeekala pa mbidi paabo. 21 Chapitre 21 *1 Na A Yikalayika balungwile Mose’shi : Esaambe na ba tshiite-mwakwidi, baana ba Alone, webalungule obe’shi : Abituungu tshiite-mwakwidi teyikashanga butete pankatshi pa miilo ku mwanda wa muntu mufwe, 2 kukaasha mukwabo a mu shibo, nyinaye, na nshaye, mwanaye mulume, mwanaye mukashi, na mukwabo mulume a munda ; 3 anka bwa mukwabo mukashi kii nsongwakashi kamame a mu shibo mwabo, shabaandjile kwibakila, bwaye’ye akeekala butete. 4 Takeyikashanga butete bu fumu a kifuko munkatshi mwa mwiilo waye, bwa kwilwishiisha nya. 5 [Ba tshiite-mwakwidi] tambapwandjikile kwikuula ebala mu mutwe wa’bo nya, na tabeteendanga mapaka a mieefu ya’bo sunga kwitapa nsalo mu mbidi y’abo. 6 abakeekala selele, [bepaane] kwi Efile Mukulu aabo, na tabakamweshanga eshina di’Efile Mukulu aabo bu dii butete, mwanda abalambula bitapilo bia A Yikalayika bia kushiikwa mu kaalo, mukate1 w’Efile Mukulu aabo ; n’abakekala selele. 7 Tabayibakilanga mukashi mwikale nduumba sunga mukashi musengwe ; na tabayibakilanga mukashi mutuushwe ku bulunda kwi mulume aaye, mwanda tshiite-mwakwidi [ooso] e selele, [mwipaane] kwi Efile Mukulu aaye. 8 N’obe namu omwate bu e selele, mwanda alambula mukate w’Efile mukulu oobe. Koodi ekale selele, mwanda ami ne mwilamuune selele, ami, A Yikalayika enulamuuna selele. 9 Na su mwana a tshiite-mwakwidi mukashi bepeepesha pa kutambuka lusandji, beekasha nshaye butete ; akashiikwa mu kaalo. 10 Na shiite-mwakwidi mukata a munkatshi mwa bakwabo, yawa shaa ku mutwe kupongoolwe mwimu wa kifikiinyo na mwikale mwipaane bwa kufwala bilaba [bii selele], ta kuleka mutwe waye mwaasa na ta kusaana bilamba biaye. 11 Tafikanga peepi na kitaanda kia muntu mufwe ; teyikashanga butete sunga kwekala bwa nshaye, sunga mbwa nyinaye ; 12 na takutuuka mu shibo y’efile Mukulu yi selele , na takalwisha shibo yi selele y’Efile Mukulu aaye ; mwanda kwipaana kwa mwimu wa kufikinyakw’Efile Mukulu aaye kwi paadi. Ami, ne A Yikalayika. 13 Na akeebakila nka mukashi kii kamame. 14 Mwana mukashi mufwilwe, sunga mutuushwe ku bulunda, sunga mukashi musengwe, mukashi nduumba, baaba tshiite-mwakwidi teebakilanga ; anka akebakile nsongwakashi kíi kamame a munkatshi mwa miilo yaye. 15 Na tafiitshishanga baana baaye munkatshi mwa miilo yaye nya, mwanda ami, ne A Yikalayika amulamuuna selele. *(1) Sunga’shi : kidiibwa ki’Efile Mukulu. 16 Na A Yikalayika besaambile na Mose, aye nkwamba’shi’ : 17 Esaambe na Alone, wambe’shi ; Muntu su ngumune a ku musuku oobe, bu bipungo biaye bioso, shaa kilema kikampanda [kia] mbidi, takeseesanga bwa kulubula2 mukate3 w’Efile Mukulu aaye ; 18 mwanda yawa ooso shaa kilema pa mbidi takefubwiila peepi nya : muntu mpofu, sunga asumpikita, sunga shaa mpembe yibaatakane, sunga shaa mboko ata mukoolo ula ukile ukwabo ; 19 su mmuntu mutshokokye lwao sunga mboko ; 20 sunga shaa katuumba, sunga mmula munyanunukye, sunga shaa musoonga mwiyiso, sunga e na busungu bwa mu kikoba, sunga shaa mapote, sunga shaa midiba ya mabudi yisoosekye. 21 Muntu su ngumune a ku musuku wa Alone, tshiite-mwakwidi, akasanganwa mwaadi na kilema kia pa mbidi kikampanda, takafikanga peepi [na kilambwilo] bwa kulubula bitapilo bia A Yikalayika bishiikwe mu kaalo nya ; mwaadi mwi kilema kia pa mbidi : takeseesa bwa kulubula mukate w’Efile Mukulu aaye nya. 22 Akadia mukate w’Efile Mukulu aaye, bintu bikilekile selele na bintu bii selele ; 23 kiasha kukuma nkutwela muunda mwa kilamba kia lushiko, na takwiseesa peepi na kilambwilo, mwanda mwaadi mwi kilema kia pa mbidi, na talwishanga mashibo ande e selele nya3 ; mwanda nami, ne A Yikalayika, ebalamuuna selele. 24 Mose namu besaambile biabia na Alone mpaa na baana baaye, na kwi baana ba Isalele boso. *(1) Sunga’shi : Kulambula. — (2) Sunga’shi : kidiibwa ki’Efile Mukulu. — (3) Sunga’shi : bintu biande bii selele. 22 Chapitre 22 1 Na A Yikalayika besaambile na Mose, aye nkwamba’shi : 2 Lulungula Alone na baana baaye balume bwa’shi, balamunukye1 ku bintu bi selele bia baana ba Isalele, na’shi tabamweshanga eshina diande di selele bisumanga mu bintu biabandambula. Ami, ne A Yikalayika. 3 Ebalungule’shi : Muntu ooso a ku musuku oobe, mu bipungu bienu, akukita’shi, aye e na butete bwaye pa mbidi paaye, eseese peepi na bintu bii selele biabadi balambule A Yikalayika kwi baana ba Isalele, yawa muntu akakaashiibwa ku meeso kwande. Ami, ne A Yikalayika. 4 Muntu su ngumune a ku musuku wa Alone, e na kifwi sunga shaa musololo , takudia bintu bi selele, mpaa na pakeekala mutoshiibwe : na yawa akakumu muntu mwiikashwe butete pa kukuma kitaanda kia muntu mufwe, sunga [kukuma] muntu mutuushe meema a bu mulume, 5 sunga yawa mukume nyema akeekaka paashi ooso yawa amwikasha butete ku kwikumeena na butete booso mbwabwadi mukume, — 6 muntu a kukuma biabia ? akeekala butete mpaa na ku kiolwa, dingi takadia bintu bii selele, anka akusuula mbidi yaye mu meema : 7 na kunyima kwa nguba kupona akeekala mutoshiibwe ; kunyima kwa biabia namu, akadia bintu bii selele, mwanda nyi mukate waye. 8 [Muntu su ngumune a kwabadi] takudia nyema mwifwile, sunga ngabadi bayipee [kwi nyema a kisuku], bwa kwiyikasha butete kwi yawa nyema. Ami, ne A Yikalayika. 9 Na [Ba tshiite-mwakwidi] abakalame kiakia kinankamika bwa kulama, bwa’shi tabasemunanga bubi pa mbidi paabo, na’shi tabafwanga, lufu lwa kwikala bamweshwe miiya yande butete. Ami ne A Yikalayika ebalamuuna selele. 10 Na muntu wenyi2 su ngumune takudia kintu kii selele ; yawa mushaale kwa tshiite-mwakwidi, na mwina mufubo, tabakudia kintu kii selele nya. 11 Anka su tshiite-mwakwidi mmuwule mpika na fwalanga yaye, uno akebidia, mpaa na yawa mutandjiibwe mu shibo yaye : baaba abakadia mukate waye. 12 Na mwana mukashi a tshiite-mwakwidi, su mbamwibakile kwi muntu mwenyi3, takudia milambu yibweshwe ya bintu biiselele nya. 13 Anka su mwana mukashi a tshiite-mwakwidi mmufwilwe na mulume sunga mbamupele ku bulunda, shii mutande baana, taadi mwalukye mu shibo ya nshaye, bu ku bunsongwakashi bwaye, aye mmulombeene kudia mukate4 wa nshaye ; anka muntu shii a mu kifuko kia ba tshiite-mwakwidi su ngumune takeudia nya. 14 Na su muntu, adia kushii’ye kuwuka, baadi kintu kii selele, akapa tshiite-mwakwidi kiakia kintu, n’akatenteka kipindji kimune kia mu bipindji bitano panundu. 15 Na tabakamweshanga bintu bii selele bia baana ba Isalele bu bii butete, biabia biabalambula kwi A Yikalayika bu mulambu wibooshwe, 16 na tabebanyenyekanga bushito bwa kilubilo akitungu kitapilo kia kupishiibwa, pabakadia bintu biabo bii selele, mwanda ami A Yikalayika ebalamuuna selele. *(1) Sunga’shi : Batale biabia bintu ku bula. — (2) Sunga’shi : Muntu shii a mu nshibo ya tshiite-mwakwidi ; tala Bibadiko.17. 40. — (3) Ngi kwamba’shi : yawa shi-tshiite mwakwidi. — (4) Sunga’shi : kidiibwa kia nshaye. 17 Na A Yikalayika besaambile na Mose, aye nkwamba’shi : 18 Esaambe na Alone na baana baaye balume, mpaa na baana ba Isalele boso webalungule’shi : Yawa ooso a mu shibo ya Isalele, sunga a ku bantu be mu kuteemba mu Isalele, akulubula mulambu waye, muyiile kwitshipa kwabo na muyiile milambu yabo yoso ya p’eshimba5 yabakalubula bu bitapilo bia kushiikwa mu kaalo kwi A Yikalayika, 19 bwakwikala mutaambulwe [A Yikalayika], akalambula nyema mulume shii kilema, a ku bimunwanga bikata, ku mikooko, sunga ku mbushi. 20 Tanulubulanga kintu su nkimune kiikale na kilema pa mbidi, mwanda tabakenutaambula nakio nya. 21 Na su muntu balubula kitapilo kia kufukama, bwa kupudisha kishiyo kia katshipo, sunga bu mulambu wa p’eshimba, wikale wa ku bimunwanga bipeela, [mulambu waye] mulambu waye aukeekala ushii kilema, bwaudia kwikala utaambulwe ; wawa mulambu tawikalanga na kilema kia pa mbidi su nkimune. 22 Tanulubulanga kwi A Yikalayika kintu kitudikye [meeso], sunga nkitshikokye [mifufwa], su nkipolokye malonda, sunga nkii na malonda atote, su mpusu6, su mabubila7 na tanukitanga nabio kitapilo kishiikwe mu kaalo pa kilambwilo. 23 We mulombeene kukita kitapilo ky’eshimba8 kia nyema a ngombe sunga nkia mwana a mukooko9 e na [kilema kia] mikoolo ila sunga yipi ; anka bwa [kitapilo kia kulombasha] katshipo, yaya nyema tayikatambulwa nya. 24 Na tanukalubwilanga A Yikalayika kintu kifiingye, sunga nkisoose, sunga kitukulwe, sunga nkitshibwe10 ; tanukakitanga biabia mwiumbo dienu. 25 Na kwiyaasa dia muntu mwenyi, tanukalubulanga kintu sunga nkimune kia ku biabia bintu bu mukate w’Efile Mukulu ; mwanda kulwishiibwa kwabio kwi mwabidi ; kwi kilema mwabidi : tabikatambulwa ku mwanda wenu nya. *(5) Sunga’shi : Milambu ya kwikyebela. — (6) Sunga’shi : malady a kinkuse. — (7) Sunga’shi : mapote, bikunu. — (8) Sunga’shi : Kitapilo kia kwikyebela. — (9) Sunga’shi : mwana a mbushi. — (10) Sunga’shi : kintu kituungulwe. 26 Na A Yikalayika besaambile na Mose, aye nkwamba’shi : 27 Mwana a ngombe, sunga a mukooko sunga mwana a mbushi, kiakatuka mu kutandwa, akeekale [muunda mwa] mafuku musambobidi muushi mwa nyinaye ; kubanga p’efuku dia mwaanda na kunyima, akeekala mukumiinwe bu mulambu wa kitapilo kishiikwe mu kaalo bwa A Yikalayika. 28 N’anwe tanukatshiindjianga nyema a ngombe mukashi, su mmukooko ukashi, ayena mwanaye, mwifuku dimune. 29 Dinga su anulambula A Yikalayika kitapilo kia lutumbu, nwikilambule bwabadia kwinukuminyiina kianka. 30 Akikadiibwa’nka diadia efuku ; tanukalekanga kintu su nkimune mpaa na ku namashika. Ami, ne A Yikalayika. 31 Nukalame’nyi mayi ande, na nukeafubile, Ami, ne A Yikalayika. 32 Tanukansengyeshanga eshina diande dii selele, anka nankeekala mulamuunwe selele pankatshi pa baana ba Isalele : ami, ne A Yikalayika enulamuuna selele 33 [na] mwinutuushishe mwiumbo dia Eshipitu biandja kwikala Efile Mukulu’enu. Ami, ne A Yikalayika. 23 Chapitre 23 *1 Na A Yikalayika besaambile na Mose, aye nkwamba’shi’ : 2 Esaambe na baana ba Isalele, webalungule’shi : Mafuku atshibiibwe1 a A Yikalayika, anudia kuleesha, aakeekala a biikongeeno bi selele. 3 Mafuku ande atshibiibwe ngano : Mafuku asamombo ngakufuba mufubo ; efuku dia musambobidi namu nyi efuku dia Sabato a kwikisha, kiikongeeno kii selele ; tanukafubanga mufubo su ngumune : nyi efuku dia sabato [dilaminwe] bwa A Yikalayika mu bishaleelo bienu bioso. *(1) Ngi kwamba’shi : bipindji bitshibwe bwa kwifubula peepe n’Efile Mukulu. 4 Mafuku atshibiibwe a A Yikalayika, a biikongeeno bi selele, anudia kuleesha bantu mu bipindji biao bia mafuku afuundwe ngano. 5 Mweshi wa kumpala, [efuku] di’ekumi na dia kananka dia mweshi, pankatshi pa bioolwa bibidi, nyi Pasaka a Yeopwa. 6 N’efuku di’ekumi na dia katano dia mweshi, nyi feete a Mikate ishii na kitatusho bwa A Yikalayika : [muunda mwa] mafuku musambobidi, anukadia mikate ishii na kitatusho. 7 Efuku dia kumpala, anukeekala na kiikongeeno ki selele, tanukafubanga mufubo su ngumune ; 8 na anukalubula kwi A Yikalayika, muunda mwa mafuku musambobidi, kitapilo kia ku kaalo : p’efuku dia musambobidi [akukeekala] kiikongeeno ki selele ; tanukafubanga mufubo su ngumune. 9 Na A Yikalayika besaambile na Mose, aye nkwamba’shi’ : 10 Esaambe na baana ba Isalele, webalungule’shi : Panukeekala batwele mwiumbo dianenupa, na panukemuumbula biumbulwanga, anukatwadila tshiite-mwakwidi kisaasa kia biumbulwanga bibedi bia kunwaa kwenu ; 11 n’aye akapuka kiakia kisaasa kumpala kwa A Yikalayika, bwa’shi nwikale batambulwe ; tshiite-mwakwidi akekipuka butookye2 bw’efuku dia sabato. 12 Na [diadia] efuku dianukapukisha kisaasa, anukalambula mwana a mukooko shii kilema, na kipwa kimune, bu kitapilo kishiikilwe A Yikalayika mu kaalo ; 13 na bwa mulambu waye wa kituumbula, [anukalambula] bibidi bia mwikumi bia bukula bwi soo bufuuntwe mwimu, bu kitapilo kia ku kaalo bwa A Yikalayika mu, [akituusha] eshiko di mapembwe e buwa ; na kisaba3 kia kupoonga panundu nyi finyo, kipindji kimune kia mu binanka kia hin4. 14 Tanukadia su mukate, su ntete ikangye, su ntente ibishi, mpaa na ku diadia efuku dimune, mpaa na kipindji kianukatwala mulambu w’Efile Mukulu’enu. [Nyi] mwiiya aushadidiila losoo mu bipungo bienu, mu mashibo eenu. — 15 Biabia nukabadikye kubanga butookye bw’efuku dia sabato, kubanga diadi’efuku dianukatwaala kisaasa kia mulambu upukiibwe, [nukabadikye] mbingo5 musambobidi ; yaya mbingo yikeekale yilombane : 16 nukabadikye mafuku makumi atano mpaa na butookye bwa sabato a musambobidi, ngi nukalubule kwi A Yikalayika mulambu wa kituumbula kipya ; 17 nutwale ku mashibo kwenu mikate ibidi, ya mulambu upukiibwe ; mikate yikale ya bipindji bibidi bia mwikumi bia bukula bwi soo ; nwiyikangye na kitatusho : nyi mbikuba bibedi bilambulwe A Yikalayika. 18 Wawa mukate anukalambula nao na baana ba mukooko musambobidi bashii na bilema, na kipwa kimune, na mwana a ngombe mulume umune, na mikooko ilume ibidi : yaya nyema ngia kitapilo kia kushiikwa bwa A Yikalayika, pamune na mulambu wabio wa kituumbula na bisaba [bia yaya nyema] bia kupoonga panundu, kitapilo kia ku kaalo, bwa kutuusha eshiko di mapembwe e buwa bwa A Yikalayika 19 Nukalambule na mbushi mulume umune bu kitapilo kia [kulekyelwa kwa] bubi, na baana ba mukooko babidi ba kipwa kimume bu kitapilo kia kufukama ; 20 na tshiite-mwakwidi akebipuka pamune na mukate wa bikuba bibedi, bu mulambu upukiibwe kumpala kwa A Yikalayika, na baaba baana ba mukooko : bwa tshiite-mwakwidi, bino bitapilo abikeekala selele, [bipeebwe] A Yikalayika. 21 Na diadia efuku dimune nukayitanyine [kiikongeeno] ; abikeekala kwanudi’newe kiikongeeno kii selele ; tanukafubanga mufubo su ngumune ; [nyi] mwiiya aushadidiila losoo, mu mashibo eenu ooso, mu bipungo bienu. — 22 Na panukaumbula biumbulwanga bia mu nsenga yenu, topudishanga kuumbula mapaka a mwifuba diobe, na topumbuulanga fwayi ya biumbulwanga biobe ; webilekyele mulanda na muntu mwenyi. Ami, ne A Yikalayika, Efile Mukulu’enu. *(2) Sunga’shi : diadia efuku adiloondo dia Sabato. — (3) Babaadi mu bingi bipindji abapoongo bisaba bikishekishe biamalofu a finyo ku bitapilo ; tala Kikatukilo 25. 29 na 29. 40. — (4) Hin : nyi nkipimino, kibaadi akitwele peepi na litres inanka ya mwimu… — (5) Sunga’shi : sabato musambobidi ; tala Kipindji 25. 8. 23 Na A Yikalayika besaambile na Mose, aye nkwamba’shi’ : 24 Esaambe na baana ba Isalele, wakule’shi : Ku mweshi wa musambobidi, [efuku] dia kwibedi dia mweshi, akukeekala kwikisha bwe’nu anwe, kitentekyesho kia muloo ukata, kiikongeeno ki selele ; 25 tanukafubanga mufubo su ngumune, dingi anukalubwiila A Yikalayika kitapilo kishiikwe mu kaalo. 26 Na A Yikalayika besaambile na Mose, aye nkwamba’shi’ : 27 Mbimune, [efuku] di’ekumi dia wawa mweshi wa musambobidi, nyi efuku dikata dia kubwikiila [kwa milwisho] : adikeekala bwenu’new kiikongeeno ki selele, anukaongamisha bikudi3, na anukalubwiila A Yikalayika kitapilo kishiikwe mu kaalo. 28 Na diini diadia efuku dimune tanukafubanga mufubo su ngumune, mwanda nyi efuku dikata dia kubwikiila [milwisho] bwa kwinukitshiina mushinga wa kubwikiila milwisho, kumpala kwa A Yikalayika, Efile Mukulu’enu. 29 Mwanda muntu ooso shakenyongola mu diini diadia efuku dimune, akakashhiibwa kwi miilo yaye. 30 Na muntu ooso akafuba mufubo ooso wawa mu diini diadia efuku dimune, yawa muntu, nankamwipayisha munkatshi mwa mwiilo waye. 31 Tanukafubanga mufubo su ngumune : [nyi] mwiiya aushadidiila losoo, mu bipungo bienu, mu mbalo yenu yoso yanushaala. 32 Nyi efuku dia sabato bwenu’new dia kwikisha, na anukaongamisha bikudi bienu. Efuku dia kitema, ku kiolwa, kukatuka ku’ki kiolwa na ku kingi kilwa, nukayikishe efuku dienu dia sabato. *(3) Sunga’shi : mashimba eenu, anukeshidika. 33 Na A Yikalayika besaambile na Mose, aye nkwamba’shi’ : 34 Esaambe na baana ba Isalele, wakule’shi : Efuku di’ekumi na dia katano dia wawa mweshi wa musambobidi, nyi feete a mashibo a misokya4 bwaYepowa akakitshika muunda mwa mafuku musambobidi. 35 Efuku dia kwibedi akukeekala kiikongeeno ki selele ; tanukafubanga mufubo su ngumune nya. 36 Muunda mwa mafuku musambobidi anukalubwiila A Yikalayika kitapilo kishiikwe mu kaalo ; efuku dia mwaanda, anukeekala na kikongeeno kiselele, na anukalubwiila A Yikalayika kitapilo kishiikwa mu kaalo : nyi nkakongye katshibiibwe ; tanukafubu mufubo su ngumune nya. *(4) Sunga’shi : feete a bitanda. 37 Nyi mafuku atshibiibwe5 a A Yikalayika aa anudia kufumankana, bu biikongeeno bi selele, bwakulwibwiila A Yikalayika bitapilo bia kushiikwa mu kaalo, bitapilo bishiikwe kaalo, na milambu ya kituumbula, bitapilo na bia kupoonga kwanka, efuku dioso kiakia kiabadi batuule bwa [kukita] mu diadia efuku, 38 kutentekyela ku mafuku a sabato a A Yikalayika, na kutentekyela ku bia buuntu bienu, na kutentekyela ku tutshipo twenu tooso twa kulaa, na kutentekyela ku milambu yenu yoso ya kwikyebela yanukapa A Yikalayika. 39 Anka efuku d’ekumi na dia katano dia mweshi wa musambobidi, anwe babaapu kuumbula bikunwanga bia mu nsenga, nukasankile feete a A Yikalayika muunda mwa mafuku musambobidi : efuku dia kwibedi akukeekala kwikisha, n’efuku dia mwaanda akukeekala kwikisha. 40 N’efuku dia kwibedi anukaata bikuba bia mitshi yi buwa, malala a mabo, na ntabi ya mitshi yii na mabuula na ntabi ya mitshi yikuunkule mieela ; nukasepeele kumpala kwa A Yikalayika, Efile Mukulu’enu, muunda mwa mafuku usambobidi. 41 Na ku kipwa na kipwa, nukasankile feete’nka bu feete a A Yikalayika, muunda mwa mafuku musambobidi ; [nyi] mwiiya aushadidiila losoo [kw’anu] mu bipungo bienu : nwasankilanga [feete] mu mweshi wa musambobidi. 42 Anukashaleela mu bitanda, muunda mwa mafuku musambobidi ; beena eumbo boso mu Isalele abakasheleela mu bitanda, 43 bwa’shi bipungo bienu bishinguule’shi nashadikile baana ba Isalele mu bitanda, paapa panandi mwibatuushishe mwiumbo dia Eshipitu. Ami, ne A Yikalayika, Efile Mukulu’enu. 44 Na Mose balungwile baana ba Isalele mafuku atshibiibwe5 a A Yikalayika. *(5) Ngi kwamba’shi : bipindji bitshibwe bwa kwifubula peepe n’Efile Mukulu. 24 Chapitre 24 *1 Na A Yikalayika besaambile na Mose, aye nkwamba’shi : 2 Kamikila baana ba Isalele batwaale mwimu wa mpafu wi selele, ufinwe, bwa bimunyi, bia kuteembesha1 elampi kwifuku n’efuku. 3 Alone akedilumbuula kumpala kwa A Yikalayika, ku kipindji kioso, kubanga ku kiolwa mpaa na ku namashika, paasha pa kilamba kia lushiko kia bu-kamoni, mu shibo y’efumankeeno : [nyi] mwiiya aushadidiila losoo kw’anudi mu bipungo bienu ; 4 [Alone] akalubula malampi ku kituulo kii selele, kumpala kwa A Yikalayika, kipindji kioso. *(1) Tala mu Kikatukilo 25, 37. 5 Waate’ni bukula bwi soo, oteekye n’abo bituumbula ekumi na bibidi : kitumbula kioso akikeeka kia bipindji bibidi bia mwikumi ; 6 webituulu mu milongo ibidi, [bitumbula] bisamombo ku mulongo, pa meesa e selele, kumpala kwa A Yikalayika, 7 na otuule kabaanda ke selele pa mulongo na mulongo ; abikeekala mukate wa kitentekyesho, kitapilo kia ku kaalo bwa A Yikalayika. 8 Efuku dioso dia sabato abakebilongo kumpala kwa A Yikalayika, bebikitshiine baaba ba Isalele, ku kipindji kioso : [nyi] nkilombeeno akishadidiila losoo. 9 Na bino mbitu bi ku matalwa a Alone na baana baaye balume, dingi abakebidiila mu mbalo yi selele ; mwanda abikeekala kwadi bu kintu kikile selele munkatshi mwa bitapilo bia A Yikalayika bishiikwe mu kaalo : [nyi] mwiiya aushadidiila losoo. 10 Na songwalume mwana a mwina Isalele mukashi (anka nshaye baadi mwina Eshipitu), batuukile munkatshi mwa baana ba Isalele ; mwana a mwina Isalele mukashi na muntu a beena Isalele babaadi abalu ngoshi mu kibundji ; 11 na yawa mwana Isalele mukashi nkusabuula Eshina na kwidiela mulwa ; na babamutwadile kwi Mose. Aku namu eshina dia nyinaye dibaadi bu Shelomite, mwana a Dibidi, a mu kisaamba kia Dana. 12 Babamutuudile mu kilamino, bwa kumona mwa kumwatshila kitshibilo, muyiile eyi2 dia A Yikalayika. 13 Na A Yikalayika besaambile na Mose, aye’shi : 14 Tuusha yawa muntu beele mulwa paasha pa kibundji3 ; baaba namu bamupushanga batentekye maasa aabo ku mutwe waye, na kakongye kooso kamwase mabwe. 15 Okesaambe’ni na baana Isalele, webalungule’shi : Muntu ooso akeela Efile Mukulu aaye mulwa, akasemuna bubi bwaye ; 16 na yawa akasaabuula eshina dia A Yikalayika akaipayibwa mwiyendo : kakongye kooso takakakutwa kumwaasa mabwe nya ; abakayipaa kubanga kwi mwenyi mpaa na kwi mwina Isalele mutandwe muno, payikala musabuule Eshina. 17 Na su muntu bayipaa mungi muntu, eyendo akayipayibwa. 18 Na yawa akayipaa nyema, akakita eshiintu, muwa kwa muwa. 19 Na su muntu apetesha mwinaye kilema kia pa mbidi, abamukitshi namu biabia bibakitshi : 20 batshokosheena bamutshokole namu, eyiso kw’eyiso, eyino kw’eyino ; mupuunda kilema kia pa mbidi kibalemesha muntu, ngi biabamukitshi namu. 21 Yawa [akayipaa] nyema, akashiintula, na yawa akayipaa muntu [amwipee nkoma], abakamwipaa. 22 Akukeekala mwiiya umune ku mwanda wenu : abikeekala kwi mwenyi nka biabidi kwi mwina Isalele mutandwe muno ; mwand’ami, ne A Yikalayika, Efile Mukulu’enu. 23 Na Mose besaambile na baana ba Isalele, n’abo namu babatuushiishe yawa beele mulwa paasha pa kibundji, bamwipaa na mabwe. Na baana ba Isalele babakitshiine bu bibaabadi bakamikile Mose kwi A Yikalayika. *(2) Sunga’shi : muyiile kwakula kwa A Yikalayika. — (3) Sunga’shi : paasha pa musuumba. 25 Chapitre 25 *1 Na A Yikalayika besaambile na Mose, pa mwengye wa Sinai, aye nkwamba’shi : 2 Esaambe na baana ba Isalele, webalungule’shi : Panukeekala batwele mwiumbo dianenupa, eumbo adikayikisha [efuku dia] sabato a A Yikalayika. A Yikalayika. 3 Muunda mwa bipwa bisamombo okakunu mbio mwifuba diobe, na muunda bipwa bisamombo akasosweela efuba diobe dia finyo, okakuule bikuba bia mwifuba ; 4 na kipwa kia musambobidi, akukeekala efuku dia sabato a kwikisha bwa eumbo, sabato [mubiikilwe] A Yikalayika : tokakuna mbio mwifuba diobe nya, na tokasosweelanga efuba diobe dia finyo nya. 5 Towumbulanga kintu kiimeene ku biumbulwanga [bikile], na tanusangulanga tukuba twa Finyo twa ku mutshi wanushii basosweele : akikeekala kipwa kia kwikisha bw’eumbo. 6 Na diadia efuku dia sabato a eumbo adikenukwasha bu kidiibwa, koodi obe, nakwi mufubi oobe mulume, na kwi mufubi oobe mukashi, na kwi muntu oobe ofutaa, na kwi mwenyi mufikye koobe, 7 na kwi kimunwanga kiobe na kwi nyema ayikeekala mwiumbo diobe : kioso akikatuusha efuba akikenukwasha bwa kudia. 8 Na okabadikye sabato musambobidi ya bipwa, musambobidi misuusa musambobidi ; na mafuku a aa ma sabato musambobidi a bipwa aakakupa bipwa makumi ananka na kitema. 9 Na ku mweshi wa musambobidi, [efuku] di’ekumi dia mweshi, weeleshe eyi dia mpungi dipushikye ; efuku dia kubwikiila kwa milwisho, nukeeleshe mpungi mwiumbo dienu dioso ; 10 dingi nulamuune kiakia kipwa kia makumi atano, na nweele musaase wa bulungantu mwiumbo kwi bantu booso bemushaale : akukeekala [kipwa kia] muloo kwanudi ; anukaalukiila muntu na muntu mu kipindji kiaye kia nsenga, n’anukaalukiila muntu na muntu mu kifuku kiaye. 11 Kiakia kipwa kia makumi atano akikeekala kwanudi bu [kipwa kia] muloo : tanukakunanga mbio, na tanukaumbulanga kintu kioso kiimeene, tanukakuulanga tukuba twa finyo ishii isosweelwe ; 12 mwanda nyi [nkipwa kia] muloo : akiikala kwanudi bu kipwa kilamuunwe selele ; anukadia’nka biabia bintu biimeene mwifuba. 13 Mu kiakia kipwa kia Muloo, anukaalukiila muntu na muntu mu kipindji kiaye kia nsenga. 14 Na su oudisha kintu kwi mwinobe, sunga’shi oulu kintu ku maboko kwa mwinobe, muntu talwishiishanga mukwabo nya. 15 Owule kwi mwinobe [bintu] mupuunda bungi bwa bipwa kubangila ku kipwa kia muloo ; aye namu akuudishe mupuunda bungi bwa bipwa bia kuumbula. — 16 Muyiile namu abikaamina bungi bwa bipwa, obe okaamishe namu muulo ; na muyiile abiiki bungi bwa bipwa, obe namu ayishe muulo, mwanda nyi bungi bwa misuusa ya kuumbula yakuwudishe. 17 Muntu su ngumune a kwanudi talwishiishanga mwinaye, otshiine Efile Mukulu oobe, mwanda ami, ne A Yikalayika, Efile Mukulu’enu. 18 Nukafubile miiya yande, na nukalame bitshibilo biande, na nwibifubile, na biabia anukashaala mwiumbo ku matwi talalaa ; 19 n’eumbo adikenutushiishaa biumbulwanga bi bungi, anukadia nwikute, n’anukashaala ku matwi talalaa. 20 Anka su nwamba’shi : A nkini kiatukadia mu kipwa kia musambobidi ; talang’atwe, tatukwete kukuna, na tatuumbula bintu bietu [bia mu mafuba] ? 21 Nankatuma eyi bwa’shi mwabi wande wiikale panudi mu kipwa kia kasamombo, akio kikatuushe bintu bia bipwa bisatu. 22 Na kipwa kia mwaanda, anukakuna na anukadia biumbulwanga bikulu , mpaa na kipwa kia kitema ; mpaa na kipindji akikawumbulwa bintu [bia mu kipwa kia ktema] ; anubaanda kudia bintu bikulu. 23 N’eumbo tadikapanyibwa losoo nya, mwanda eumbo ndiande ; ku mwanda anwe, nwi kwandji bu bantu benyi na bu bantu be mu lwendo. 24 Na mwiumbo dienu dioso dianukatambula, anukatuusha muulo wa matalwa a kukuula nsenga. 25 Su mukwenu bulanda bubamukwata, na baudisha kipese kia nsenga yayye, paapa yawa e na matalwa a nkuulo, mukwabo e peepi n’aye, afikye akuule kiakia kintu kibapaana mukwabo. 26 Anka su muntu bakutwa kwikala na mukwabo e na matalwa a nkuulo, na maboko aaye namu abafubu na kutuusha bilombeene kukuula, 27 akabadika bipwa kubanga kuudishwa kwa’kio, na akaalusha ntenteko kwi yawa abaudiishe, kunyima aalukye mu kipindji kiaye kia nsenga. 28 Na su maboko aaye tangatuushe bilombeene kumwalwisha, kiakia kintu kiwudishwe akikashaala mu maasa a yawa baadi mwikiuule, mpaa na ku kipwa kia Muloo : kintukiwudishwe akikapoosodiibwa kwifuku dia Muloo, na [yawa bawudiishe] akaalukiila mu nsenga yaye. 29 Na su muntu baudisha nshibo ya kishaleelo mu kibundji kikiingye mudimba, akeekala na matalwa a nkuulo mpaa na ku nfudiiloa kipwa kia kuwudishwa : matalwa aaye a nkuulo aashadidiila kipwa kishima ; 30 anka su yaya shibo yakutwa kukuulwa kumpala kwa’shi kipwa kishima kikumbane, yaya shibo yi mu kibundji kikiingye mudimba ayishadidiila losoo kwi yawa awulu, mu bipungo biaye ; tabakeyipoosola kwifuku dia Muloo nya. 31 Anka mashibo a mu bibundji bishii midimba yifuunyishe, aatshiibwa bu mafuba a mwiumbo ; akukeekala matalwa a nkuulo ku mwanda wa’o, dingi aakapoosodiibwa bulungantu kwifuku dia Muloo. 32 Na pa bitale bibundji bia beena Lefi na mashibo a bibundji bia mu kipindji kia nsenga yabo1, beena Lefi abeekala na matalwa a nkuulo ashadidiile looso. 33 Na su muntu bakuula kwimungi mwina Lefi, shibo yabadi baudishe mu kibundji ki mu nsenga yabo yaya shibo abakeyilekyeela bulungantu ku kipwakia Muloo ; mwandamashibo a mu bibundji bia beena Lefi nyi nkintu kiabo munkatshi mwa baana ba Isalele. 34 Na mafuba e nkunkula bibundji taakupanyiibwa nya, mwanda nyi nkintu kiabo bwa losoo. *(1) Bitale bibundji bia beena Lefi, otale mu mukanda wa Joshuwa 21. Bioso bibaadi bibundji makumi ananka na mwaanda. 35 Na su mukwenu bulanda bubamukwata, na maboko aaye aasuusu mbwipi moobe, omukankamikye, mwenyisunga mukidi’eshinda, bwa’shi ashaale na muwa peepi n’obe. 36 Twatanga kwadi ntenta ya makasa sunga mbikasaala ; anka otshiine Efile Mukulu oobe, bwa’shi mukwenu ashaale na muwa poodi. 37 Tomwiyapushanga fwalanga yoobe’shi akwalwiishe na ntenteko, na tomwiyapushanga bidiibwa biobe’shi akwalwiishe na bikasaala. 38 Ami, ne A Yikalayika, Efile Mukulu’enu, mwinutuushishe mwiumbo dia Eshipitu bwa kwinupa eumbo dia Kanaana, [na] bwa kwikala Efile Mukulu’enu. 39 Na su mukwenu bulanda bubamukwata poodi, na beudisha koodi, tomufubishanga mufubo wa bu mpika ; 40 akeekala n’obe bu mwina mufubo afubila efuto na bu mukidi’eshinda ; akakukwasha mpaa na ku kipwa kia Muloo : 41 paapa akatuuka mu shibo yobe, aye, na baana baaye pamune, na akaalukiila kwi kifuko kiaye, akaalukye mu kipindji kia nsenga kia ba nshaye. 42 Mwanda abo nyi mbafubi bande, bandji mutuushishe mwiumbo dia Eshipitu ; tabakawudshwa mu kipaso kiabawudisha bapika nya. 43 Tomumunanga na bukyelo nya, otshiine Efile Mukulu. 44 Anka pa bitale mufubi oobe mulume sunga mufubi oobe mukashi be bu boobe, … ba munkatshi mwa maumbo enukungile, kwi baaba, nuwule bafubi balume na bafubi bakashi. 45 Nukawule’ni na baana ba bantu benyi be munkatshi mwenu, na baana ba mu bifuko biabo bii n’enu, babakatanda mwiumbo dienu ; abakeekala bu kintu kienu. 46 N’anukebalekyela baana benu bebapiane [bu bupiani bwabo] kunyima kwenu, bwa’shi beekale n’abo bu kintu kiabo ; abakeekala abenukwasha bwa losoo ; anka pa bitale bakwenu, baana ba Isalele, muntu su ngumune tamunanga mukwabo na bukyelo nya. 47 Na su muntu mwenyi sunga muntu mushaleele koobe bafiimisha bupeta, mukwenu namu e peepi n’obe bulanda bubamukwata beudisha kwi muntu mwanyi mushaleele koobe, sunga kwi muntu a mu kifuko kia yawa mwenyi, — 48 paapu kwiudisha, akukeekala matalwa a nkuulo ku mwanda waye ; umune a ku bakwabo akamukuula ; 49 sunga mwina a nshaye mulume, sunga mungi mukwabo a mu kifuko e peepi akamukuula ; sunga’shi maboko aaye ngakufuba akuumbasha, ekuula aye nabene. 50 akabedika na yawa bamuudile, kubanga kipwa kibeudiishe kwadi mpaa na ku kipwa kia Muloo ; na fwalanga ya muulo waye ayikala muyiile bungi bwa bipwa ; akeekala kwa fumwaye muyiile mafuku a mwina mufubo afubila efuto. 51 Su kukii bipwa bi bungi, akaalusha muulo wa nkuulo yaye mupuunda biabia bipwa, kutenteka pa muulo wawa ubaudiishwe nao ; 52 na su kubashaala bipwa bipeela mpaa na ku kipwa kia Muloo, akabadika n’aye ; mupuunda bungi bwa bipwa,akaalusha muulo wa nkuulo yaye. 53 Akeekala kwaye bu muntu afubila efuto, ku kipwa na kipwwa ; fumwaye tamumunanga na bukyelo mu meeso moobe nya. 54 Na su tamukuulwe ku bukome bwaye’ye nabene, akatuuka kipwa kia Muloo, aye na baana baaye pamune. 55 Mwanda baana ba Isalele nyi mbafubi bande ; mbafubi baandji mutuushishe mwiumbo dia Eshipitu. Ami, ne A Yikalayika, Efile Mukulu’enu. 26 Chapitre 26 *1 Tanwikitshiinanga b’efile, na tanwimikanga kiifwanyi kisee, su nkishi, na tanukatuukanga ebwe disoongye mwiumbo dienu, bwanudia kukunama kumpala kwa’bio ; mwanda ami, ne A Yikalayika Efile Mukulu’enu. 2 Nulame mafuku aande a sabato, na nuneemekye mbalo yande yi selele. Ami, ne A Yikalayika. 3 Su nubalonda miiya yande, na su nubalama mayi ande na kwiafubila, 4 nankenunokyesha mpeshi yenumu nsaa yayo, na nsenga ayikatuusha biumbulwanga biayo, mutshi namu upe bikuba biao. 5 Kipindji kia kipuula kwenu akukatungunuka mpaa na ku kipindji kia kukuula kwa tukuba twa finyo, na kipindji kia kukuula kwaato akukafisha mpaa na pa kukuna kwa mbio ; anukadia biakudia bienu nwikute, na anukashaala ku matwi talalaa mwiumbo dienu. 6 Ami namu nankenupa kufukama mwiumbo ; n’anwe anukalaala kushii muntu akwinutshiinisha ; nankashimishisha nyema ya bukyelo mwiumbo, na lupete lwa ngoshi talukakidila mwiumbo dienu nya. 7 Anukabiinga beshikwanyi n’enu, n’abo abakapona ku lupete lwa ngoshi ku meeso kwenu. 8 Na bantu batano ba munkatshi mwenu abakebingisheena na bantu lukama, bantu lukama namu abakabinga binunu ekumi, na beshikwanyi n’enu abakapona ku lupete lwa ngoshi ku meeso kwenu. 9 N’ami nankeyaluula kwanudi, nankenutandishisha baana, na nankenufimishisha bungi, dingi nankakumbasha kilombeeno kiande n’enu. 10 Anukadia biumbulwanga bia kala bilamiibwe, n’anukatuusha bia kala kumpala kwa bipya. 11 Ami nankatuula shibo yande yi selele ya misokia munkatshi mwenu, n’eshimba diande tadikeekala n’enu suungu nya ; 12 nankatambukila pankatshi peenu ; na nankeekala Efile Mukulu’enu, anwe namu anukeekala mwiilo wande. 13 Ami, ne A Yikalayika, Efile Mukulu’enu, mwinutuushishe mwiumbo dia Eshipitu, bianusha kwikala bapika b’abo : nantshokola nkano yanye kikuumbo kienu, na nenutambushishha mutwe mwiulu. 14 Anka su nwakutwa kumpushiisha, na su nwakutwa kufubila mayi ande, 15 na su nwapeesha miiya yande, na su eshimba dienu dibashikwa bitshibilo biande, mu kipaso kianusha kufubila mayi ande na nwatshiba kilombeeno kiande, 16 ami namu, nankenukita bino : nankenutshiinisha, nankenutumina mikuumbo anyinunyanyisha na mbidi kaalo, abikayipaa meeso eenu na kwinubofusha mashimba ; na mbio yenu anukeyikuna mu bisumanga, mwanda beshikwanyi n’enu abakeyidia. 17 Na nankakuumba mpala yande kwanudi : anukakupidiibwa kumpala kwa beshikwanyi n’enu ; baaba benushikwe, abakabikala panudi ; na anukesuukila kushii muntu enubiingi. 18 Na dimo, su kunyima kwa biabia, tanumpushiisha, nankenunyooka dimo misuusa musambobidi bikile bukopo pa mwanda wa milwisho yenu ; 19 na nankatshokola kwineemeka kwa bukome bwenu, na nankaaluula ewulu poo bu kiamo, na nsenga yenu tayikatuusha biumbulwanga [nya], na mitshi ya mu nsenga yenu bu munyinga. 20 Anukashimisha bukome bwenu bisumanga, na nsenga yenu tayikatuusha bikuba biayo nya. 21 Na su nubatambuka n’ami mu kwikutweena na’shi nubapele kumpushiisha, nankenukupila dimo misuusa musambobidi bikile bukopo, muyiile milwisho yenu ; 22 na nankenutumina nyema ya kisuku mu kulwa n’enu, ayikenunyenga baana benu, n’ayikadia bimunwanga bienu, ayinupeelesha bungi bupeela ; na mu mashinda eenu aakashaala mwaasa. 23 Na su kukidila ku biabia bintu nubakutwa kutambula kiakia kianenuleesha, na’shi nubatambuka mu kwikutweena n’ami, 24 nankatambuka, ami namu, mu kwikutweena n’enu, nanankenukupila, ami namu, misuusa musambobidi bi bukopo, pa mwanda wa milwisho yenu ; 25 na nankafikisha panudi lupete lwa ngoshi alwaluula ngo ya kilombeeno ; na panukeekala bebungyemu bibundji bienu, nankatuma kipupa munkatshi mwenu, anukapaanwa ku maboko kwa mwishikwanyi. 26 Pankenusumina biakudia, bakashi ekumi abakenuteekyela bia kudia bienu ku mafuwa amune na abakenupa mukate wenu ku kipimo ; anukadia, na tanukeekuta nya. 27 Na su tanumpushiisha na bino, na’shi anutambuka mu kwikutweena n’ami, 28 nankatambuka n’enu na bukyelo, na nankenunyoka, ami namu, misuusa musambobidi bi bukopo, pa mwanda wa milwisho yenu ; 29 na anukadia mwiita wa baana benu balume, anukadia mwiita wa baana benu bakashi ; 30 nankapalakasha ma mbalo eenu a kuneemekyela b’efile, na nankabuumbula misuungu yenu yanudi bayibakile nguba, na bitanda bienu nankebituulu panundu pa bitanda bia b’efile beenu ba nkishi, kikudi kiande akikeenushikwa. 31 Na nankatuulu bibundji bienu bu kabaaka, nankapoombesha ma mbalo eenu e selele, n’eshiko di mapembwe e buwa dia malaashi eenu ntankedinuunka’mi, 32 nankapoombesha eumbo, na beshikwanyi abakemushaala abakakaanya ; 33 n’anwe, nankenupalakasha munkatshi mwa beena maumbo, kunyima kwenu namu nankakupila lupete lwa ngoshi, n’eumbo dienu adikabutuka, bibundji bienu namu abakashaala mushii muntu. 34 Paapa eumbo adikasankila mafuku aadio a sabato muunda mwa aa mafuku ooso adidi dipoombe : p’anukeekala’nwe [mbupika] mwiumbo dia beshikwanyi nenu ; paap’eumbo adikeekisha, n’adikasankila mafuku aadio a sabato. 35 Muunda mwa mafuku ooso adikeekala dipombolokye, adikeekisha, mwanda tadibaadi diikishe mu mafuku eenu a sabato pabaanudi bemushaale nya. 36 Pa bitale namu baaba ba munkatshi mwenu abakashaala [na muwa] nankebabofusha ku mashimba aabo mu maumbo abeshikwanyi baabo [mw’abadi], n’eunga di’epuupwa diume adipapulwa [na lupapi] adikebabiinga, abo namu abakasuuka bu abasuuku lupete lwa ngoshi, n’abakapona kushii muntu ebabiingi ; 37 Abakekokosheena’nka bu be kumpala kwa lupete lwa ngoshi, kushii muntu ebabiingi ; n’anwe tanukakumbana bia kwimana kumpala kwa beshikwanyi beenu ; 38 anukabutuka munkatshi mwa beena maumbo, n’eumbo dia beshikwanyi beenu adikenudia. 39 Na baaba namu ba munkatshi mwenu abakashaala [na muwa], abakashimiina mu milwisho yaabo, mu maumbo abeshikwanyi beenu ; abakashimiina mu milwisho ya ba nshabo, pamune n’abo. 40 N’abo, abakasokola bubi bwabompaa na bwa ba nshabo, muyiile etoombo diabo dibabatombokyele nadio, na kipaso’ni kibabatambukile bekutweene n’ami, 41 biabia namu ami, nantambukile mwikutweene n’abo, na dingi nandji mwibatwale mwiumbo dia beshikwanyi n’abo. Su paapa namu eshimba diabodishii disadiibwe adiipeelesha na’shi papa abatambula dinyooka dia bubi bwabo, 42 ami namu nankatentekyesha kilombeeno kiande [kinankitshiine] na Yakoba, mpaa na kilombeeno kiande na Isake, na dingi nankatentekysha kilobeeno kiande na Abalahama, na nankatentekyesha : 43 nsenga ibaadi isuumbusheenwe kwabadi, mu aa mafuku abaayidi ipoobolokye, abo bashii mwanka, na ibaadia kusaankila mafuku aayo a sabato ; papa namu abakakumiina dinyooka dia bubi bwabo, mwanda…, oolo, ku mwanda babapeepesha mayi ande, na’shi bikudi biabo mbishikwe miiya yande. 44 Sunga paapa, p’abakeekala mwiumbo dia beshikwanyi n’abo, ntankebapeepesha nya na ntankekala n’abo mushikwa bwa kwibashimisha, [na] bwa kwipaa kilombeeno kiande n’abo nya ; mwanda ami, ne A Yikalayika, Efile Mukulu aabo ; 45 na bwa mwanda wa’bo nankatentekyesha kilombeeno kibakitshiinwe na ba nshabo kulu, baaba banandji mutuushishe mwiumbo dia Eshipitu, mu meeso mwa beena maumbo, bwandjia kwikala Efile Muulu aabo. Ami, ne A Yikalayika. 46 Yaya nyi mayi, na bitshibilo, na miiya ibaadi ituule A Yikalayika pankatshi paaye na baana ba Isalele, kukidila1 kwi Mose, ku mwengye wa Sinai. *(1) Sunga’shi : kukanwa kwa Mose. 27 Chapitre 27 *1 Na A Yikalayika besaambile na Mose, ayenkwamba’shi : 2 Esaambe na baana ba Isalele, webalungule’shi : Su muntu bakuumbu sunga kini sunga kini ku lupese na katshipo, bantu babakeekala ba A Yikalayika muyiile koobe kumona1. 3 Na koobe kumona [kwa muulo] wa muntu mulume e na bipwa bibangile ku makumi abidi na nkafikisha ku bipwa makumi asamombo, koobe kumona akukeekala kwa [bushito bwa] shekyele makumi atano ya fwalanga, mupuunda shekyele a mu shibo yi selele2 ; 4 na su mmwana mukashi, koobe kumona akukeekala kwa shekyele makumi asatu. 5 Na su mmuntu mulume e na bipwa bibangile ku bipwa bitano na nkafikisha ku bipwa makumi abidi, koobe kumona akukeekala kwa shekyele makumi abidi, bwa mwana mukashi namu, [akukeekala] kwa shekyele ekumi ; 6 Na su mmuntu mulume e na bukulu bubangile ku mweshi umune na nkafikisha ku bipwa bitano, koobe kumona akukeekala kwa shekyele itano ya fwalanga, koobe kumona namu kwa mwana mukashi akukeekala kwa shekyele isatu ya fwalanga. 7 Na su mmwana mulume e na bipwa makumi asamombo na kunundu, koobe kumona akukeekala kwa shekyele ekumi na itano, na bwa mwana mukashi, [akukeekala] kwa shekyele ekumi. 8 Na su ekala mukile bulanda pee koobe kumona, abakamwimika kumpala kwa tshiite-mwakwidi, na tshiite-mwakwidi akatuunga muulo : tshiite-mwakwidi akatuunga muulo mupuunda kiakia kilombeene yawa balayile katshipo apeta ku maboko kwaye. *(1) Sunga’shi : muyiile muulo oobe okatuunga. — (2) Sunga’shi : muyiile shekyele abafuba n’e mu shibo yi selele kwi ba shiite-mwakwidi. 9 Na su ngumune aku nyema [ayeelwa n’ayo bitapilo] abalubula bu mulambu kwi A Yikalayika, kintu kioso kiabakapa A Yikalayika akikeekala ki selele. 10 Tabamushiintula nya, na tabakamupianikisha na mungi nyema nya, [kupianikisha] e buwa kwi ungi e bubi, sunga e bubi kwi e buwa ; na su bapianikisha, mu kiapaso kini kiakia, nyema pa mungi nyema, au na wiini amupiana ayikeekala [yoso] selele. 11 Su eekala nyema e butete abasha kulambula bu mulambu kwi A Yikalayika, abakayimika nyema kwi tshiite-mwakwidi, 12 na tshiite-mwakwidi akatuunga muulo waye, muyiile biakamuna’shi, e buwa sunga’shi e bubi ; abikeekala muyiile koobe kumona, obe tshiite-mwakwidi ! 13 Na su abakyebe kumukuula, paapa abakatenteka kipindji kimune kia mu bitano ku oobe muulo. 14 Na pe muntu balamuuna shibo yaye bwa’shi yikale selele, [yilambulwe] bwa A Yikalayika, tshiite-mwakwidi akatuunga muulo wa’yo, muyiile biayidi buwa sunga biayidi bubi ; abakayimeena pa wawa muulo aukeyitshibila tshiite-mwakwidi. 15 Na su wiini yawa eyilamuuna bakyebe kukuula shibo yaye, akatentenka kipindji kimune kia mu bitano kia fwalanga ya muulo wa koobe kumona panundu, na shibo ayikamwalukiila bu yaye. 16 Na su muntu alamuuna kipese k’efuba kia muu kipya kiaye, koobe kumona akukeekala mupuunda bintu biabakemukuna ; khomer3 a mbio ya poondo ku muulo wa shekyele makumi atano ya fwalanga. 17 Su alambula efuba kubanga ku kipwa kia Muloo ukata, abakayimeena pa muulo wa [muulo wa ] koobe kumona. 18 Na su nkunyima kwa kipwa kia Muloo kwalamuuna efuba diaye, tshiite-mwakwidi akamubadila fwalanga mupuunda bipwa bibashaala mpaa na ku [kipwa kia] Muulo, na muulo aukayishwa pe wawa oobe ubotuungu. 19 Na su yawa wiini balamuuna efuba akyebe kwidikuula, akatentenka kipindji kimune kia mu bitano kia fwalanga ya muulo wa koobe kumona panundu, n’efuba adikamusheela [bu diaye]. 20 Na su akutwa kukuula efuba sunga’shi baudisha efuba kwi ungi muntu, Tandilombeene kukuulwa nya. 21 Efuba namu pabakedipoosla bulungantu mu kipwa kia Muloo, adikeekala selele, [dilambulwe] kwi A Yikalayika, bu efuba ditshipilwe4 ; akiikala kintu ki kia tshiite-mwakwidi. *(3) khomer : nyi nkipimino, akitwela mbaafu ekumi. Tala Esekyele 45. 11. — (4) Sunga’shi : Dilambulwe looso kwi A Yikalayika. 22 Na su muntu alamunwiina A Yikalayika efuba diadi muule, dishii dia munkatshi mwa mafuba a mu kipya kiaye, 23 tshiite-mwakwidi akamubadila bungi bwa koobe kumona mpaa na ku kipwa kia Muloo, na diaida efuku akatuusha bungi bwa koobe kumona, bu kintu ki selele [kilambulwe] A Yikalayika ; 24 mu kipwa kia Muloo, diadia efuba adikaalukiila kwi yawa baadi mumuudishe dianka na kwi wiini sha kiakia kipindji kia nsenga. 25 Na kutuunga kooso kwa muulo kokakita akukeekala muyiile shekyele a mu mbalo yi selele : shekyele akeekala a guéras makumi abidi. *(4) guéra : nyi nkipimino kia bushito, kiabaadi kipindji kia makumi abidi na bitano kia shekyele umune. 26 Anka peenda mwana mbedi a munkatshi mwa nyema, mulambulwe kwi A Yikalayika bu kintu kibedi, muntu takumulamuuna nya : sunga eekala nyema a ngombe sunga eekala mwana a mukooko5, nyi nga A Yikalayika. 27 Na su nga munkatshi mwa nyema yi butete, abakamukuula muyiile koobe kumona, n’abakatenteka kipindji kimune kia mbitano panundu ; na su tambamukuule, akaudishwa muyiile koobe kumona. 28 Anka peenda kintu su nkimune kilambulwe losoo, kiabadi balambule A Yikalayika kwi muntu bwa losoo, ku bioso biadi nabio, swekala muntu, su nyema, sung’efuba dia mu kipya kiaye, kiakia takiakuudishwa sunga nkukuudiibwa : kintu kioso kilambulwe losoo akikeekala kikile selele, [kilambulwe] A Yikalayika. 29 Ooso a munkatshi mwa bantu balambulwe Efile Mukulu tamulombeene kukuudiibwa : aye mwiyendo akeekala mwipayiibwe. *(5) Sunga nyi nyema a mbushi. 30 Na kipindji kimune kia mwikumi kia mu nsenga, kia ku mbio ya mu nsenga, kia ku bikuba bia mitshi, nkia A Yikalayika : nyi nkintu ki selele [kilambulwe] A Yikalayika. 31 Na su muntu akyebe kukuula kintu ku ki’ekumi kiaye, akekutenteka kia mu bitano kimune panundu. 32 Pa bitale ki’ekumi kioso kia ku bimunwanga bikata na bipeela, kia ku bioso abikidila ku mukoombo, ki’ekumi akikeekala ki selele [kilambulwe] A Yikalayika. 33 Tabakwamuuna’shi au [nyema] e buwa au e bubi nya, dingi tabakumushiintula nya ; nka su babamushiintula, nyema mushiintulwe, na wiini amupiana ayikeekala selele, tayikakuulwa nya. 34 Yino nyi miiya yibabakamikile Mose kwi A Yikalayika bwa baana ba Isalele, pa mwengye wa Sinai. 4